UNITAL Halo Sosializasaun ba Estudante Kona-ba Registu Online ba Estájiu Servisu Sosial Díli, 04 Agostu 2026 (Media Democracia) – Universidade Oriéntal Timor Lorosa’e (UNITAL) realiza sosializasaun ba estudante sira semestre VIII kona-ba sistema registu online ba Estájiu Servisu Sosial (ESS) tinan akadémiku 2026. Atividade ne’e realiza iha kampus UNITAL, Bekora, Díli, ho objetivu atu hafasil prosesu administrativu no monitorizasaun ba estudante sira durante períodu estájiu. Tuir Tékniku IT UNITAL, Vigilo da Silva, sistema registu online ne’e hanesan parte husi progresu digitalizasaun kampus, atu fó fasilidade ba estudante sira iha prosesu pagamentu, registu no monitorizasaun ba estájiu servisu sosial. “Objetivu husi sosializasaun loron ida ne’e mak atu suporta progresu digitalizasaun kampus, hodi hafasil administrasaun, docente no estudante sira asesu ba informasaun no halo registu estájiu ho lalais no efisiente,” dehan Vigilo. Nia esplika katak tinan ida ne’e mak dala uluk UNITAL implementa sistema registu online ba ESS. Ho sistema ne’e, docente orientador sira bele monitoriza progresu estudante sira online, la presiza hein to’o remata estájiu foin simu relatóriu. “Sistema ida ne’e kria atu hafasil monitorizasaun entre estudante no docente orientador sira. Estudante sira bele hatama atividade lorloron online, no docente sira bele haree no avalia progresu sira diretamente,” hatutan nia. Vigilo mós hatete katak durante períodu tranzisaun, UNITAL sei uza sistema rua hamutuk, mak registu manual no registu digital. Ba estudante sira ne’ebé seidauk iha telemóvel ou laptop, parte administrasaun kampus sei fó apoiu hodi ajuda halo registu. Nia akresenta katak digitalizasaun ida ne’e la’ós ba tinan ida ne’e de’it, maibé sei kontinua dezenvolve no realiza sosializasaun kada tinan ba docente, funsionáriu no estudante foun sira. Iha parte seluk, estudante finalista Naor Gomes hatete nia kontente ho inovasaun sistema foun ne’e tanba facilita liu kompara ho tinan sira kotuk. “Ami sente kontente tanba tinan ida ne’e iha ona link registu online ne’ebé fasilita ami atu halo registu ho lalais no komprende diak liu prosesu estájiu,” dehan Naor. Maski nune’e, nia admite katak balun husi estudante sira seidauk komprende tomak utilizasaun sistema ne’e. Maibé, sira sei servisu hamutuk ho parte akademika atu asegura estudante hotu bele uza sistema refere. Naor mós hato’o katak dezafiu principal mak ligasaun internet no kapasidade telemóvel balun ne’ebé la suporta prosesu registu online. Maski nune’e, kampus prepara ona mekanizmu alternativa hodi ajuda estudante sira ne’ebé hasoru difikuldade teknika. Reportajen: Grupo Estajiadus Foto: Joanhino

Díli, 05 Agostu 2026 (Media Democracia) – Universidade Oriéntal Timor Lorosa’e (UNITAL) realiza sosializasaun ba estudante sira semestre VIII kona-ba sistema registu online ba Estájiu…

Posted on