Ermera, 31 Dezembru 2024 (Média Democracia) – Administrador Postu-Administrativu Atsabe servisu hamutuk ho igreja hala’o ona sosializasaun ba iha lei tara bandu ba Suku 12 iha Postu Atsabe, nune’e bele hamenus ka reduz lia iha Postu Atsabe ne’e rasik.
Iha entrevista ho Administrador Postu Atsabe Manuel Oliveira hateten, iha momentu ne’ebá estadu ho parte igreja iha hanoin no halo kooperasaun ho parte suku sira hanesan xefe suku sira atu servisu hamutuk ho parte igreja nomos komandante eskuandra Postu Atsabe villa nian atu halao sosializasaun ba iha lei tara bandu atu nune’e bele hamenus ba iha lia sira ne’ebé komunidade sira sempre halo iha sira nia suku rasik
“Kooperasaun entre parte igreja Administrador Autoridade Lokal nomos KomandU PNTL Postu Atsabe nian ne’e sempre lao ekipa tun ba iha suku aldeia sira atu fó sosializasaun ne’e ba iha komunidade sira hodi koalia ona katak atu halao sosializasaun ba iha lei tarabandu ba iha mal gastus nian liliu fó hanoin ba iha ita-nia inan aman sira ne’ebé halo lia no husi sosializasaun ne’ebé fahe husu ekipa sira ne’e komunidade balun agora komprende no halo tuir lei tarabandu ne’ebé iha no halo redusaun ba iha lia bainhira komunidade sira atu halo lia sira tenke tuir rekezitus ka lei ne’ebe iha ona.” Dehan Administrador Postu Atsabe Manuel Oliveira
Nia hatutan husi lei tarabandu ne’ebé iha komunidade sira hala’o tuir no durante ne’e lia iha maibé tenke tuir ninia rekezitus ezemplu labele fó presu ne’ebé as ba iha mane foun sira no labele obriga mane foun sira atu mal gastus ba iha lia refere atu nune’e mane foun sira mós iha kbiit atu bele mai partisipa hotu iha lia ne’ebe halo husi uma mane sira, husi lei tarabandu ne’e espera ba futuru jerasaun sira labele mal gastus ona atu nune’e bele hadia sira-nia moris ida ne’ebé diak liután.
“Durante ne’e komunidade sira halo tuir rekezitus ne’ebé fó sai katak lia halo semana ida sira tenke halo tuir duni no kumpri tebes rekezitus hirak ne’e nomos iha tara bandu ne’e bandu katak la iha dahur ho dansa no komunidade sira halo tuir, espera katak tarabandu ne’e sai hanesan fase ida atu halo redusaun ba iha mal gastus iha Postu Atsabe nian.” Nia informa
Nia salienta lei tarabandu ne’e sei kontinua ba iha suku no aldeia balun ne’ebé seidauk iha nomos ba komunidade balun ne’ebé la kumpri ba iha lei tarabandu ne’e sei simu sansaun husi parte igreja, tanba lei tarabandu ne’e antes atu hala’o sosializasaun Autoridade sira sei tur hamutuk ho komunidade sira husu sira hatan mak foin ekipa tun ba sosializa hodi realiza lei ka hala’o serimonia tarabandu iha suku refere ka iha aldeia ne’e.
Reportajen : Domingas
Foto : Domingas