Dili, 12 Agostu 2025 (Média Democracia) – Autoridade Protesaun Civil APC liuhusi Xefe Seksaun Komunikasaun (XSK) realiza Komunikadu Imprensa relata dezastre naturais husi loron 04 to’o 11 fulan Agostu iha semana ida, Protesaun Sivil rejistu uma-ka’in hamutuk 8 hetan estragus husi dezastre naturais ne’ebé akontese iha Munisípiu 4, komunikadu ne’e hala’o iha Salaun APC Caicoli Díli.
Xefe Seksaun Komunikasaun (XSK) APC, Genoveva Fernandes Almeida hateten, durante semana ida ne’e akontesementu dezastre iha Munisípiu 4, APC registu uma estragu 8 priense kriteria 5, apoiu emerjensia 3, numeru ema afetadu hamutuk 46 nune’e APC Munisípiu apoiu kedas sasan emerjensia ba vitima sira ne’ebé hetan dezastre
“Durante semana ida nia laran Autoridade Protesaun Sivil rejistu kazu dezastre naturais ne’ebé akontese iha Munisípiu 4 hanesan Munisípiu Baucau anin sobu uma 2, Munisípiu Lautem ahi-han uma 3, Munisípiu Manufahi anin sobu 1, no iha Rejiaun Administrativu Espesial Oe-cusse Ambeno RAEOA akontese anin sobu uma 1 no ahi-han uma 1, nune’e APC ne’ebé destakadu iha Munisípiu halo kedas rejistu ba vitima ne’ebé afeita ba dezastre.” Dehan Xefe Seksaun Komunikasaun (XSK) APC, Genoveva Fernandes Almeida
Nia hatutan iha Munisípiu Baucau Postu Quilicai Suku Builale Aldeia Oso-mosa iha loron 01/08/2025 akontese anin boot sobu komunidade nia uma ida nune’e tama kategoria aat naton. Iha Postu Administrativu Venilale Suku Fatulia Aldeia Uai-to-Bono iha loron 02/08/2025 akontese anin sobu komunidade nia ida ho kategoria aat naton.
“Munisípiu Lautem Postu Lautem Suku Com Aldeia Lohomatu iha loron 04/08/2025 akontese ahi-han komunidade nia uma tolu hetan de’it apoiu emerjensia tanba kategoria uma dapur. Iha Munisípiu Manufahi Postu Same Suku Betano Aldeia Loro, iha loron 04/08/2025 akontese anin sobu komunidade nia uma ida tama iha kategoria aat total.” Haktuir Xefe Seksaun Komunikasaun (XSK) APC
Xefe Seksaun informa, iha Rejiaun Administrativu Espesial Oe-cusse Ambeno RAEOA iha sub rejiaun Pante Makasar iha Suku Taiboko Aldeia Makelab iha loron 06/08/2025 akontese ahi-han komunidade nia uma ida hetan de’it apoiu emerjensia. Aleinde ne’e iha Aldeia Nenum iha loron 05/08/2025 akontese ani sobu komunidade nia uma ida hetan de’it apoiu emejensia hodi fasilita ba vitima ne’ebé hetan dezastre.
Esplika liután komandu APC ho parseriu relevante sira ne’ebé destakadu iha Munisípiu ida-idak nian nune’e hodi apoiu ai-han no la’os aihan ba vitima sira. Aleinde ne’e komandu operasional autoridade protesaun sivil Munisípiu hotu, sei kontinua halo levantamentu dadus ba uma-kain ne’ebé hetan estragus total no naton hodi hein prosesu, nune’e bele hetan apoiu husi governu.
Reportajen : Nelfiano
Foto : Nelfiano