Dili, 10 Janeiru 2025 (Média Democracia) – Governu liuhusi Sekretariu Estadu Asuntu Toponímia Urbana (SEATOU) halo diálogu ho Komunidade sira iha Suku Kuluhun Postu-Administrativu Cristu Rei Munisipiu Dili, relasiona ho alargamentu iha estrada publiku husi diresaun Kuluhun to’o Fatu-ahi.
Tuir Sekretariu Estadu Asuntu Toponímia Urbana (SEATOU) Germano Santa Brites, ohin hala’o diálogu ho komunidade sira iha Suku Kuluhun Postu-Administrativu Cristu Rei Munisipiu Dili relasiona ho alargamentu iha estrada publiku.
“Planu alargamentu estrada hahu ohin no daudaun ne’e inkontru ona ho komunidade iha Suku Kuluhun Postu-Administrativu Cristu Rei, Munisipiu Dili, no aban sei inkontru ho Suku Becora no iha semana oin sei hahu iha suku Camea, atu inkontru ho sira atu bele sira komprende nune’e lalalok to’o iha ne’ebé atu bele prepara-aan oinsa atu koopera ho estadu atu sira bele muda fatin, nune’e bele haree estrada ninin ho fó espasu ba transporte publiku sira atu sirkula. Liuliu iha estrada boot husi Kuluhun to’o Fatu-ahi klot tanba tinan ba tinan aumenta kareta no motor. Nune’e mak governo liu husi Sekretariu Estadu Asuntu Toponímia no Urbana (SEATOU), fó ona avizu ba komunidade sira ne’ebé hela besik iha alargamentu estrada publiku bele prepara-aan tanba iha levantamentu dadus no dezeñu ne’ebé iha, orsida sei hatudu ba komunidade sira atu bele prepara-aan hodi muda se’es husi estrada ninin atu nune’e fó biban Governu atu bele halo servisu.” Dehan Sekretariu Estadu Asuntu Toponímia no Urbana (SEATOU) iha Sede Suku Kuluhun.
Iha parte seluk tuir Xefe Suku Kuluhun Deus Dado Martins haktuir katak, ohin Sekretariu Estadu Asuntu Toponímia no Urbana (SEATOU) halo diálogu ho Komunidade sira oinsa atu prepara-aan hodi bele muda, liuliu Komunidade sira ne’ebé hela besik estrada boot, tanba SEATOU fó ona data hahu husi dia 09 fulan Janeiru to’o 09 fulan Fevereiru, atu Komunidade sira bele hamamuk fatin sira ne’ebe tama ona lista, liuliu iha levantamentu dadus nian.
“Ohin Sekretariu Estadu Asuntu Toponímia no Urbana (SEATOU) halo diálogu ho Komunidade sira oinsa atu prepara-aan hodi bele muda liuliu komunidade sira ne’ebé hela iha estrada boot, tanba ohin SEATOU fó ona data hahu husi dia 09 fulan Janeiru to’o dia 09 fulan Fevereiru, atu komunidade sira bele hamamuk fatin. Tanba levantamentu dadus iha Suku Kuluhun por-volta 30, maibé iha aldeia kampun-baru 2, maioria rai estadu nian, no iha Aldeia Loelako kategoria rai privadu, maibé Estadu halo identifika katak, rai estadu ona komunidade tenki halo koopera ho estdau hodi bele muda, maibé tenki iha kompesasaun husi rai privadu no rai estadu lahanesan.” Dehan Xefe Suku Kuluhun Deus Dado Martins
Nia afirma liután katak, iha Komunidade Kuluhun prontu atu koopera ho governu oinsa para bele hamamuk fatin, tanba Autoridade Suku no Xefe Aldeia sira nafatin fó korajen ba komunidade sira atu bele koopera ho estdau liuliu governu sira atu bele hadia estrada publiku sira.
Reportajen : Tomas
Foto : Tomas