Dili, 13 Janeiru 2025 (Média Democracia) – Laurentina de Cavalho ho idade 27 husi Munisipiu Baucau Postu-Administrativu Venilale daudaun ne’e hela Munisipiu Dili postu-Administrativu Dom Alexo Suku Comoro Aldeia Beto Barat, loron-loron halo atividade negosiu hanesan fa’an Boba iha estrada ninin hodi sustenta ba presiza nian.
Tuir Laurentina de Cavalho hateten, liuhusi atividade negósiu hanesan fa’an boba iha estrada ninin tanba hakarak hetan osan ituan hodi hadia moris husi mukit, nune’e labele tane lima ba ema seluk tanba ida ne’e tenke esforsu-aan halo negósiu
“Ha’u deside kria rasik negósiu ida ne’e tanba hakarak muda moris liuhusi negosiu simples ida ne’e ajuda ona ha’u hola buat ne’ebé ha’u presiza loron-loron nian, iklui haruka balun ba Munisípiu fó ba inan-aman hodi suporta alin sira ba iha nivel edukasaun nian. Bainhira ita tur de’it iha uma se mak ajuda ita-nia familia, ne’eduni buat hotu tenke esforsu-aan buka rasik liuhusi dalan oioin, nune’e bele hetan osan ituan hodi bele fasilita ita-nia presiza loron-loron nian.” Dehan Laurentina de Cavalho
Nia hatutan osan ne’ebé lori halo negósiu uza nia osan rasik ho montante 50 dolar lori hola sasan sira ne’ebé presiza atu halo boba hanesan susuben, pop ice inklui sasan sira seluk. Maske ho rendimentu ne’ebé naton maibé nafatin fiar hodi lao ba oin
“Ha’u loke negósiu ki’ik ida ne’e komesa husi tinan kotuk fulan abril 2024 nia laran ha’u lori osan $50 dolar lori ba kompra sasan sira ne’ebé presiza atu halo boba. Entaun iha momentu ne’ebá ha’u rasik deside tenke ba fa’an iha estrada boot, nune’e fasil ba ema atu hatene lalais nomos besik iha eskola 30 Agostu estudante barak gosta atu hola no ha’u fa’an presu normal iha $0,50 no 1.00 dolar, entaun loron ida ha’u sempre hetan osan $20 dolar ba leten.” Dehan nia
Nia salienta boba ne’ebé nia fa’an tuir presu normal hanesan $0,50 no 1.00 dolar, entaun kada loron sempre hetan osan to’o $20 dolar ba leten no dalaruma folin la to’o tanba haree situasaun no kondisaun, tanba agora tempu udan fó impaktu boba ladun folin, nune’e loron ida dalaruma hetan de’it $10 dolar
Esplika kle’an liután katak hanesan feto potensial iha kreativu rasik hodi loke negósiu ki’ik iha estrada ninin, nune’e bele hetan osan hodi sustenta ba presiza loron-loron nian no suporta mós alin sira ba nivel edukasaun, maske durante ne’e loke negósiu sempre hetan dezafiu oioin maibé nafatin esforsu-aan hodi alkansa mehi ne’ebé iha no sei hetan di’ak iha futuru.
Reportajen : Nelfiano
Foto : Nelfiano