Dili, 13 Janeiru 2025 (Média Democracia) – Ministériu ba Asuntu Kombatente Libertasaun Nasionál (MACLN-sigla Portugues), hamutuk ho Sekretáriu Estadu Asuntu Veteranu (SEAV) no Komisáriu Komisaun Libertasaun Nasionál (CCLN-sigla portugues) nomos Komisaun Libertasaun Nasionál Munisipais 13 realiza konferénsia imprensa hodi fó sai Ofisialmente Lista Kombatente rejistadu no validadu segundu rejistu 2009 ba públiku.
Ministéria ba Asuntu Libertasaun Nasionál Gil da Costa Monteiro “Oan Soru” hateten, reuniaun ba asinatura editais kombatente rejistadu no validadus rejistu 2009, husi totál rejistu hamutuk 124.782.
“Iha segundu rejistu 2009 nian valida hamutuk 102.049 pedidu rejistu no husi 102.049 pedidu rejistu validadus iha periodu fulan Outubru 2019 to’o fulan novembru 2023, no ohin asina ofisializa hanesan rekoñesementu estadu atu taka sai iha sede konsellu munisipál CCLN, administrasaun Munisípiu no Postu-Administrativu iha territóriu nasionál hotu hamutuk 92.59.” Dehan Ministru Gil Da Costa Monteiru
Nia dehan pedidu rejistu ho kategoria sira hanesan tuir mai;
“Iha ne’e dadus ne’ebé fó sai ohin 92.591 ne’e ema ne’ebé sei hola parte eskalaun 1 Ka 20-24 anus ema nain 14 iha territóriu tomak, 15-19 hamutuk ema 186, 8-14 hamutuk ema 9.375, pensaun ba sira ne’ebé defisiénte kapasidade de traballu hamutuk 359 pensaun sobrevivénsia hamutuk 22.252, Prestasaun Pikunária únika ka (PPU) hamutuk ema 23.560, sira ne’ebé menus de 3 anus hamutuk 35.272 no sira ne’ebé Não-Combatente hamutuk na’in 1.574. Total mak ohin mensiona ona 92.591 pesoas.” Nia dehan
Nia informa katak bazeia ba estatutu kombatente libertasaun nasionál lei númeru 3/2006 loron 12 fulan Abril ne’ebé altera dala rua.
“Lei nú 3/2024 husi loron 12 fulan Juñu, lista sira ne’e taka sai ba públiku Iha loron 15 fulan Janeiru 2025 lista sei taka iha territóriu tomak iha sede CCLN Munisípiu ninian iha sede autoridade Munisipál no iha Postu-Administrativu sira, husu ba ema interesante sira atu hakat ba Munisípiu no Postu-Administrativu husi ida-idak nia moris fatin atu bele haree lista naran sira ne’e, tanba nasional sei la prega lista Iha Ministériu no CCLN Comoro iha ne’e la taka lista tanba ema ne’ebé rejistadu ema ida-idak iha nia Munisípiu nasionalmentu inklui Dili nian rasik iha sede Munisipal nian.” Nia informa
Governante ne’e afirma bainhira atu konsulta lista tomak husi editál bele vizita portál konsulta veteranu nian.
“Liuhusi pájina internet macln.net ne’e ita boot sira hatene ona katak atu asesu husi portal Ministériu ne’e husi telefone rasik, importante mak hakerek tuir liafuan ne’ebé mensiona, iha ne’ebá ita boot sira bele hatene ona dadus eletrónika direitamente iha ne’ebá.” Nia Afirma
Nia mós esplika katak kombatente libertasaun nasionál hotu katak tuir lei sei iha loron 69 atu aprezenta reklamasaun kona-ba sira-nia dadus.
“Kontestasaun hasoru kombatente ruma nia dadus, signifika iha loron 60 nia laran ne’e kombatente ida ne’ebé nia naturalidade no data la loos mak reklama sei la mai ko’alia asuntu seluk tanba verifikasaun ne’ebé halo iha Munisípiu hotu, imajina hahú husi 2009 termina iha Dezembru 2023 maibé prosesu implementasaun tuir regra foin mak agora dadaun ita hasai tanba iha orsamentu 2025 mak ita foin prevé orsamemtu bazeia ba dadus ida ne’e.” Nia esplika
Ministru ne’e husu ba públiku antes loron 15 katak iha ema ruma ne’ebé sirkula ilegál hodi tama sai uma halo verifika ba lista veteranu atu sai lalais karik lalika fiar.
“Ema ilegal sira ne’ebé agora dadaun sei la’o sirkula tun sa’e tama sai imi-nia uma kombatente nia uma dere imi-nia odamatan hodi dehan imi liuhusi ha’u buat hotu fasil de’it bainrua ka baintolu imi-nia osan sai ona, atensaun didi’ak ba públiku tomak labele fiar ilegal sira.” Nia afirma
Tanba dadaun ne’e nia rona informasaun katak ema deskoñesidu balu hodi hateten ba Pesoál rejistadu sira katak liuhusi nia (ema deskoñesidu), pensaun sei sai lalais, maibé ema ne’ebé hala’o atividade kona-ba dadus rejistadu ne’e tenke ba husi Ministériu Asuntu Kombatente Libertasaun Nasional ka husi Administrasaun CCLN Nasionál ka ninia Munisipiu sira iha territóriu inklui Raeoa.
Reportajen : Estefania
Foto : Estefania