Dili, 16 Janeiru 2025 (Média Democracia) – Sekretariu Estadu Formasaun Profesional no Empregu (SEFOPE) Rogerio Araujo Mendonça hateten sei Kompremitidu atu esforsu resolve saláriu minimu antes mandatu remata.
“Ha’u Kompremitidu ba ita-bo’ot sira iha publiku katak mandatu ha’u nia ne’e resolve kona-ba salariu menimu, maibé tempu ne’e ha’u hateten tinan agora no tinan oin sei rezolve.” Dehan Sekretáriu Estadu ba Jornalista sira iha salaun Timor Lodge Kuarta, (15/01)
Sekretariu Estadu Formasaun Profesional no Empregu (SEFOPE) ho Kompremitidu depois lori ona saláriu mínimu ba Konsellu Ministru.
“Depois Konsellu Ministru haruka fila mai hodi hadi’a fali iha pontu balun, ne’ebé pontu balun ita sei hadi’a no Sekretáriu Estadu Formasaun Profesional no Empregu (SEFOPE) sei konsulta parte relavante sira hodi kontrola presu sasan iha merkadu.” Nia dehan
Nia afirma katak Karik hasa’e salariu mínimu ho urjente no ba merkadu sira, hasa’e sasan nia presu iha merkadu tuir idak-idak nia hakarak sei prejudika povu ne’ebé atu ba sosa nesesidade ne’e.
Antes ne’e, Konfederasaun Sindikatu Timor-Leste (KSTL) sei aproxima hikas Nonu-Governu lidera husi Primeiru Ministru (PM) Kay Rala Xanana Gusmão hodi konsidera hikas proposta esbosu lei bá hasa’e Salariu Minimu bá traballador sira iha Timor-Leste.
Prezidente KSTL Almeiro Vila-Nova hateten, kona-ba polemika salariu minimu, bainhira iha reuniaun Konsellu Ministru (KM) iha fulan Abril 2024 haruka fila proposta dekretu lei Salariu Minimu ba iha Konsellu Nasional do Trabalho atu haree fila-fali.
Tanba ne’e, nia dehan, iha tinan kotuk Konsellu Nasional do Trabalho ne’ebe kompostu Tripartida hanesan, Reprezenta Governu mak Sekretáriu Estadu Formasaun Profisional no Empregu (SEFOPE), reprezenta Empregador Mak Camara Comersiu Industria, Timor-leste (CCI-TL) nomos reprezentante Trabalhador mak KSTL hodi diskute fila-fali.
Ho nune’e, esforsu ne’e mak Konsellu Nasional Trabalho halo mak apromixasaun ba iha Ministeriu balun, hanesan Ministeriu Asunto Kombatente Libertasaun Nasional (MACLN), tanba iha ligasaun oituan kestaun salariu minimu ba iha lei veteranus nian, tanba ne’e Konsellu Nasional Trabalho halo reuniaun ho Ministru Gil da Costa “Oan Soro”.
Tan ne’e, bazeia bá enkontru ne’ebé Konsellu Nasional Trabalho ho MACLN maka sira mós sei haruka pareser juridiku ne’ebé sei ko’alia kona-ba kestaun juridiku ligadu bá iha problema Salariu Minimu ne’e. Maibé to’o agora sira seidauk haruka sira-nia pareser juridiku mai.
“Ami mós sei haree fila-fali kestaun barak, ita halo fali peskiza data ne’ebé iha ligasaun ho salariu minimu refere. Ida né’e planu husi Konsellu Nasional Trabalho atu halo peskiza. Ami KSTL nia posizaun mak ezije nafatin atu SEFOPE lori fila-fila proposta né’ebá iha Konsellu Ministru, tanba proposta dekretu lei ho montante salariu minimu né’e sei relevantes.” Hateten Almeiro Vila Nova via-whatsap , Tersa (14/01).
Nia mós preokupa karik haruka hikas fali persiza foun hanesan Konsellu Ministru ninia rekomendasaun, entaun orsamentu montante salariu minimu $150 ne’ebé propoin né’e la to’o bá traballador sira, nune’e rezultadu foun montante bele liu ida ne’e.
Reportajen : Estefania
Foto : Pajina Ofisial Sefope