Dili, 02 Maiu 2025 (Média Democracia) – Romario husi Munisipiu Covalima Postu Administrativu Suai hanesan LGBTIQ ” transjender” no halo nia atividade servisu hanesan soru tais, hahu iha tinan sanulu resin-rua soru ona tais to’o sai hanesan xefe grupu makerek badaen soru nain Suai.
Xefe grupu makerek badaek, Romario hateten, hahu aprende soru tais ne’e tinan sanulu resin rua tur iha banku pre-secundariu aprende soru tais ne’e husi inan ho avo mãe tanba loron-loron iha uma ama ho avo mãe sira hala’o atividade hanesan kesi futus, dair tais nomos soru entaun loron-loron sempre haree to’o aprende hamutuk iha uma.
“Ha’u mós gosta aprende soru tais entaun loron-loron ha’u gosta haree hela de’it ama ho avo sira soru, entaun iha momentu ne’eba ha’u komesa buka ona kolega feto sira tanba ha’u hanesan transjender entaun hamutuk ho kolega feto sira ami aprende soru halimar tais, maibé uluk ami atu aprende soru tais ne’e primeiru hahu soru husi tali, ami kesi tali modelu hanesan tais depois loron-loron soru hela de’it to’o ami hatene, depois mak foin haruka ama sira kesi futus hodi soru tais.” Dehan Xefe grupu makerek badaek, Romario
Nia informa tais ne’ebé soru ne’e hahu kedas husi beiala sira to’o mai agora, entaun familia moris hanesan agrikultór nomos familia simples, entaun ama soru nain, avo sira mós hanesan soru nain, iha ne’eba hanesan transjender gosta tebes atu aprende soru tais husi idade naton loron-loron haree de’it ama ho avo sira soru tais.
“Durante ha’u aprende kesi tali hodi soru hanesan tais ho kolega feto sira to’o soru Tais hatene sente orgullu ida ba ha’u maske hanesan transjender maibé ha’u la moe atu aprende no agora ha’u sai hanesan xefe grupu soru nain nian reprezenta ha’u ho kolega sira mai iha ne’e lori Munisípiu Covalima nia naran hodi hanorin soru ba alin joven feto oan sira.” Dehan nia
Nia afirma Tais sira ne’ebé grupu rasik soru ne’e mai ho motivu no kor ne’ebé la hanesan nomos tais sira ne’e ho folin ne’ebe diferente tanba haree ba iha kabas nia folin sosa karik kabas ba tais mane ne’e folin karun kada tais ida bele hetan $200 ba leten depende ba kor no motivu husi tais mane ne’e, nomos ba iha kabas ba soru tais feto ne’e folin hahu husi $100 to’o $160 depende ba kabas karik folin sae entaun tais mós tenke folin sae.
“Produsaun ba tais ne’e bainhira ita soru tais feto ne’e minimu semana rua, karik loron-loron ita soru los de’it la to’o semana rua, karik ita iha servisu seluk mak ita la foku ba soru entaun bele fulan ida nia laran foin soru hotu tais ida. Osan sira ne’ebé durante ne’e ami nia grupu soru tais iha balun rai, balun sosa fali kabas no balun ami fahe, tanba ami servisu hamutuk hanesan grupu tenke fahe osan.” Nia haktuir
Esplika liután tais sira ne’ebé grupu soru ne’e uluk laiha merkadu entaun tais sira ne’e fa’an de’it iha Munisipiu Covalima laran maibé agora ne’e estadu no NGO sira apoiu entaun tais sira ne’e lori mai iha Munisipiu Dili hodi fa’an nomos daudaun ne’e iha rasik merkadu tais nian entaun tais sira ne’e tau de’it iha merkadu hafoin kliente sira sosa iha fatin refere.
Repotajen : Domingas
Foto : Domingas
Editor : Jp.Costa