Dili, 05 Maio 2025 (Média Democracia) – Iha ambitu komemorasaun loron mundial liberdade imprensa loron 3 maio 2025 Provedor Direitus Umanus no Justisa PDHJ konsidera jornalista jill jollife no Max Stahl nomos jornalista nain hira ne’ebé mate iha tempu luta ba liberdade nasaun Timor-Leste hodi sai referensia ba jornalista Timor-oan sira.
Iha entrevista ho Provedór Direitus Umanus no Justisa PDHJ Virgilho da silva Guterres “Lamukan” hateten, atividade ohin ne’e realiza husi Embaixadora Portugal iha Timor-Leste hodi komemora liberdade imprensa mundial, maibé iha atividade ne’e foku liubá oinsa atu hanoin hikas figura jornalista nain rua ne’ebé importante tebes ba iha nasaun Timor-Leste, jornalista nain rua ne’e maka ida Jill Jollife nomos Max Stahl sira nia esforsu durante iha Timor-Leste.
“Hanesan Provedor hetan konvite husi Embaixada hodi mai fahe hanoin ruma kona-ba tema ne’ebé foka liuba jornalista nain rua ne’e nia memoria kona-ba jornalista nain rua ne’e durante sira luta iha rai ida ne’e, laos Provedor mesak deit mak koalia maibé hamutuk mós ho orador nain haat seluk atu fahe hanoin relasiona ho servisu jornalista nian durante ne’e, ida ne’e mak objetivu prinsipal husi atividade komemorasaun loron mundial liberdade imprensa ba tinan ida 2025.” Lia-hirak ne’e hato’o husi PDHJ Virgilho da silva Guterres “Lamukan” iha ambitu komemorasaun loron liberdade imprensa iha Embaixada Portugal. 03/05/2025
Nia hatutan jornalista nain rua ne’e hanesan referensia ida ba iha jornalista Timor-oan sira nomos referensia boot ba iha luta inkinsavel “luta ida ne’ebé ita la hatene kole” tempu uluk nian, tanba ne’e sira nain rua sai referensia importante tebes ba iha jornalista Timor-oan katak barreira ka limitasaun ne’e laos problema ba iha jornalista nain rua, maibe ne’e hanesan dezafiu atu prova sira nia liberdade
“Tanba ne’e mak pelumenus iha ha’u nia moris bainhira sira nain rua sei moris ha’u nunka rona sira nain rua nia lamentasaun kona-ba militar sira tau imposizaun barak atu limita sira nia Liberdade, maibé sira lao nafatin buka meius oinsa atu sira bele ba to’o iha sira nia fontes ne’ebé ema la hatan sira atu bele husu, ezemplu hanesan Max Stahl ba buka guerilieros sira hodi entrevista Jill Jollife ba buka Nino Konis Santana hodi halo entrevista hanesan ohin ita asiste video dokumentasaun tempu uluk nian.” Tenik PDHJ Virgilho da silva Guterres “Lamukan”
Nia reafirma, haree ba iha tempu uluk luta ne’ebé sira nain rua hasoru maka sira hatene katak fontes sira hanesan ohin temi ona ne’e susar atu hasoru maibé sira la kole atu buka meus oinsa hodi bele entrevista fontes ne’e no sira fiar katak jornalista ne’e hanesan servidor publiku ida entaun atu halo servisu sira ne’e presiza sakrifisiu ne’ebe boot laos ba buka osan maibé tenke sakrifisiu sira nain rua nia-an iha tempu luta ba independensia ne’e, tan ne’e mak PDHJ konsidera jornalista nain rua sai hanesan referensia, laos deit sira nain rua iha mós maluk jornalista nain lima ne’ebé mate iha Balibo nomos iha Dili.
Reportajen : Domingas
Foto : Domingas
Editor : Jp.Costa