Dili, 05 Maio 2025 (Média Democracia) – Ambitu komemorasaun loron mundial liberdade imprensa tinan 2025 Provedor Direitus Umanus no Justisa PDHJ deklara relasiona ho index ne’ebe tun ba 39, nune’e PDHJ husu jornalista sira atu sadere ba lia loos, nomos husu entidades hotu- hotu labele limite jornalista nia servisu iha publiku.
Iha entrevista PDHJ hateten, haree ba iha servisu jornalista iha nasaun Timor-Leste nian primeiru atu fó saudasoes ba kolega jornalista sira hotu ne’ebé hala’o sira servisu, maibe ho preokupasaun husi PDHJ nian mak index top 20 ne’e monu kedas ba iha index top 39 ne’e laos notisia foun ba PDHJ maibé ne’e hanesan prevejibel, signifika liberdade imprensa iha Timor ne’e iha ameasaun nian laran tanba haree iha tinan kotuk jornalista Timor-oan barak mak hetan problema ho governu sira hanesan iha kolega feto nain rua ne’ebé hetan amesa husi SEATOU nomos polisia, jornalista balun ne’ebé hetan notifikasaun husi Ministeriu Publiku intervensaun husi SECOMS ba jornalista sira, entaun husi problema hirak ne’e mak index bele monu tanba fó ameasa ba liberdade imprensa iha nasaun ida ne’e.
“Tuir lolos problema sira ne’ebé ohin ha’u temi ne’e labele akontese, tanba bainhira problema hanesan ne’e jornalista sira hasoru bebeik entaun bele fó impaktu ba iha ameasa liberdade imprensa husi referensia sira, no dadus ba iha reporteres sem fronteiras hodi hamonu index liberdade imprensa monu ba renking 39, signifika katak liberdade ba iha jornalista Timor-oan sira ne’e iha ameasaun nia laran.” Lia-hirak ne’e hato’o husi PDHJ Virgilho da silva Guterres “Lamukan” iha ambitu komemorasaun loron liberdade imprensa iha Embaixada Portugal
Nia informa husu ba jornalista sira atu nafatin existe nomos nafatin fahe informasaun ba iha publiku maibé tenke bazeia ba iha faktus nomos verifika evidensia sira ne’e hodi kontinua lao nafatin, husu mós ba jornalista sira tenke sai individu ida ne’ebé independente labele sadere ba iha partidu.
“Ha’u atu hateten deit ba jornalista sira katak, jornalista sira ne’ebé ohin ha’u temi hanesan referensia, no sira ne’e prova katak jornalista labele netral nomos jornalista tenke foti opsaun, entaun opsaun ne’ebé durante sira nain hira foti ne’e mak lia loos. Kona-ba lia loos ne’e labele negosia no labele dependente “sadere ba partidu ruma” maibé tenke independente “mesak” jornalista iha dever importante maka sadere ba lia loos.” Informa PDHJ Virgilho da Silva Guterres “Lamukan” iha ambitu komemorasaun loron liberdade imprensa iha Embaixada Portugal
Nia informa klaru labele haluha katak maske la iha intervensaun governu maibé anotasaun ba reporteres sem fronteira ne’e anota ona desde tinan hirak liubá katak lei komunikasaun sosial ne’e sei iha artigu balun ne’ebé sai ameasa ba jornalista sira ne’e iha lei rasik ne’e hakerek hela iha ne’ebá tanba ne’e presiza hadia lei komunikasaun.
“Agora ita tenke haree hotu ba iha problema hirak ne’e uluk ita iha index hitunulu resin-ida 2021 depois tun ba sanulu resin-hitu 2022 no iha 2023 ne’e index tun ba sanulu tanba ita hadia tutuir maibé agora tun sae fali ba index top 39, ne’e nota katak ita-nia liberdade imprensa ne’e hetan ameasa no limita jornalista nia servisu, bele mós iha setor ekonomiku katak kompaña media sira la fó liberdade editorial ba Xefe Redasaun sira atu publika notisia tuir politika Redasaun nian, seluk mak limita politika haree ba governu sira ne’ebé halo limitasaun ba iha jornalista sira nia servisu.” Informa PDHJ Virgilho da silva Guterres “Lamukan” iha ambitu komemorasaun loron liberdade imprensa iha Embaixada Portugal
Mensajen husi Provedor Direitus Umanus no Justisa, husu ba jornalista hotu tenki servisu makas liután, tanba agora ne’e ema hotu moris iha era globalizasaun nomos média barak mak halo kompetisaun ba iha notisia barak liu, no hakarak notisia ne’e to’o lalais ba leitor sira entaun hanesan Provedor husu no enkojara nafatin ba jornalista sira atu hakerek notisia tenke iha faktus no verifika antes publika notisia sira, nomos husu ba jornalista sira tenke sader ba lia loos ida ne mak dever jornalista nian.
Reportajen : Domingas
Foto : Domingas
Editor : Jp.Costa