Dili, 09 Maiu 2025 (Média Democracia) – Prezidente Republika Timor-Leste José Ramos Horta hato’o mensajen ba Sua Santidade foun Papa Leão XIV ne’ebé eleitu hodi troka Papa Francisco.
Horta dehan ba povu Timor-Leste tomak nu’udar katoliku hanoin hotu-hotu deste horiseik akompaña ona eleisaun konsellu cardeal sira iha roma atu hili Amu Papa foun hodi troka fali saudozu Papa Francisco, entaun ohin dader konsege hili ona Amu Papa foun iha Roma.
“Amu Papa foun ne’e sidadaun Amerikanu husi sidade Chicago ho naran foun Leão XIV, ita hotu-hotu espera no iha konfiansa ba papel ne’ebé Amu Papa saudozu Francisco halo iha mundu nomos iha Timor-Leste luta ba kiak, kiik nomos luta ba ekonomiku mundial ne’ebé justu, nia koalia makas ba terus ne’ebé iha gaza no ko’alia makas ba situasaun iha mianmar ba funu dalabarak ona ho forsa moral ne’ebé mai husi Papa Fransisco, Papa Leão XIV sei kontinua misaun ida ne’e ba mundu tomak.” Dehan Prezidente Republika Timor-Leste José Ramos Horta
Horta hatutan maske Amu Papa la’ós figura politika nain la’ós figura estadu nomos la halo politika maibé husi nia mensajen kona-ba dame no solidariedade ba kiak sira iha nasaun hirak ne’ebé agora sei funu hela, ne’e importante tebes tanba ne’e se maka tur iha São Pedro nia kadeira iha roma tenke halo tuir saida mak iha ona.
“Importante hanesan inspirasaun lideransa moral etika ne’ebé bele mai husi santase. Ha’u fiar Amu Papa Leão XIV ne’ebé uluk besik liu Papa Francisco sira iha esperensia ne’ebé hanesan Amu Papa Francisco atu bele kontinua lori misaun ne’e ba mundu tomak.” Hatutan Prezidente Republika Timor-Leste José Ramos Horta
Nia reafirma Amu Papa Francisco ne’e ema husi Argentina, tinan hirak nia laran Amu Papa Francisco hatene problema lubuk iha ne’eba hanesan mós Amu Papa Leão XIV tinan ruanulu iha peru fiar katak nia mós hatene kona-ba saida mak pobreza, saida mak terus ne’ebé ema kiak no mukit sira hasoru, ne’e duni iha konfiansa ba mundu aktual ho problema ne’ebé barak tebes maibé espera katak Amu Papa Leão XIV bele fahe nia mensajen ne’ebé mai ho forsa nu’udar Papa ba mundu tomak nomos iha esperansa katak Amu Papa sei tau matan ba sarani katolika iha mundu no ba nasaun Timor-Leste.
Reportajen : Domingas
Foto : Media Officer PR