Díli, 12 Maiu 2025 (Média Democracia) – Asosiasaun Akademi Esdutantil, Fakuldade Medicina Ciensia Saúde UNTL realiza Konferensia imprensa relasiona ho ezizensia ne’ebé asosiasaun estudantil hatama ona karta maibé seidauk iha resposta positiva husi parte Fakuldade no Universidade, komunikadu ne’e hala’o iha Kampus FMCS, Caicoli Dili.
Porta-voz FMCS Jermano do Santos Morreira hateten, ohin Asosiasaun Akademi Esdutantil Fakuldade Medicina Ciensia Saúde hala’o fila fali komunikadu imprensa ida ne’e tanba relasiona ho ezizensia ne’ebé asosiasaun hato’o antes ona maibé seidauk hetan resposta husi Fakuldade no Departamentu rasik, tan ne’e Asosiasaun Akademi Esdutantil hamrik fila-fali atu reafirma asosiasaun nia posizaun ba iha publiku relasiona ho ezizensia ne’ebé durante ne’e asosiasaun rasik halo ona.
“Liuhusi komunikadu imprensa ida ne’e Asosiasaun Akademi Esdutantil Fakuldade Medicina Ciensia Saúde hakarak afirma dala ida tan ba iha publiku katak denunsia publika ida ne’e nu’udar kontinuasaun ne’ebé asosiasaun rasik halo ona iha loron 29 fulan abril tinan 2025, iha Universidade Nasional Timor lorosa’e, tanba Asosiasaun Akademi Esdutantil Fakuldade Medicina Ciensia Saúde nota katak estrutura Universidade nomos estrutura Departamentu tenta atu abandona kazu ne’ebé Asosiasaun Akademi Esdutantil Fakuldade Medicina Ciensia Saúde submete ona, maske ami halo ona esforsu lubuk ida hanesan submisaun karta, enkontru direta maibé to’o agora seidauk iha resposta ba kazu hirak ne’e.” Dehan porta-voz ba jornalista sira
Porta-voz hatutan ho aktu iresponsabilidade husi parte Universidade nomos fakuldade sira maka Asosiasaun Akademi Esdutantil Fakuldade Medicina Ciensia Saúde konsidera katak:
- Magnifiko reitor iha kompetensia tomak atu halo abertura ba iha prosesu disiplinar maibé iha kazu refere magnifiku reitor tenta atu ignora, husi ida ne’e hatudu katak orgaun Universidade nian la halo ona tratamentu justu no igual ba komunidade akademika, maibé sai fali kolaborador ba pratikante sira iha UNTL.
- Husu ba Dekana Faculdade Medicina Siensia no Sáude FMCS hatudu nia inkapasidade no sai protetor ba dosente balun ne’ebé pratika kazu asediu seksual, kobransa ilegal nomos viola norma UNTL nian, ida ne’e hatudu katak dekana rasik admite atu kazu hirak ne’e akontese, maske iha prinsipiu valores no regulamentu sira bandu atu labele akontese iha Universidade.
- Husu ba Diretor Departamentu Parteira ho dosente sira halo departamentu hanesan los sira nia kompaña privadu, iha ne’eba sira limite estudante atu labele hala’o sira nia estajiu, maske kolega estudante priense hela rekezitus estajiu nian, ida ne’e hatudu katak Diretor ho estrutura uza ambiente akademika sai fali fatin ba ameasa estudante sira.
- Husu ba Diretor STS senti alergia tebes ho estudante sira nia kritika tanba tinan barak aproveita departamentu sai hanesan fatin negosiu no fatin atu hetan lukru, ida ne’e violasaun grave ne’ebé akontese iha Departamentu maibé Diretor refere konsiente hanesan ne’e baibain no sai ona tradisaun ba nia.
Ho pontu prinsipal hirak ne’e Asosiasaun Akademi Esdutantil Fakuldade Medicina Ciensia Saúde hakarak rekomenda ba
- Rekomenda ba magnifiku Reitor UNTL atu foti medida urjentemente ba kazu iha Fakuldade Medicina Siensia Sáude no halo xamada urjentemente ba Dekana FMCS, Diretor Departamentu Parteira, no Diretor STS tanba tenta ignora kazu estudante sira hasoru iha Fakuldade rasik.
- Husu ba Magnifiku Reitor UNTL atu urjentemente loke prosesu disiplinar hasoru Diretor STS ne’ebé aproveita estudante sira hodi hetan lukru atu satisfas deit nia nesesidade pesoal no ameasa estudante no loke mós prosesu disiplinar hasoru Diretor Departamentu Parteira ne’ebé kansela estudante nain tolu la tun estajiu, maske estudante nain tolu ne’e priense ona rekezitus estajiu nian.
- Husu ba Diretor Departamentu STS atu fó fila Xave odamatan Asosiasaun Akademi Esdutantil Fakuldade Medicina Ciensia Saúde ne’ebé Diretor foti ka prende hela iha loron 29 fulan abril tinan 2025 nune’e husu diretor atu entrega hikas fali xave.
- Husu ba Diretor STS no Diretor Parteira atu tun husi kargu ne’e tanba aktu ne’ebé Diretor nain rua hala’o la reflete hanesan manorin nain ne’ebé diak ba FMCS.
- Husu ba Civitas Akademika Fakuldade Medicina Ciensia Saúde atu hamutuk ho Asosiasaun Akademi Esdutantil Fakuldade Medicina Ciensia Saúde hodi hateten lae ba esprolarasaun iha Universidade no limite atu dosente sira labele viola estudante sira nia direitu.
- Husu ba Asosiasaun Fakuldade sia atu apoiu Asosiasaun Faculdade Medicina hodi blokeia funsionamentu Fakuldade Medicina no Sáude karik estrutura la hola medida ruma iha loron tolu nia laran.
Reportajen : Komunikandu Imprensa Asosiasaun Akademi Esdutantil Fakuldade Medicina Ciensia Saúde UNTL
Foto : Domingas