Dili, 15 Maiu 2025 (Média Democracia) – Reitor Universidade Nasional Timor Lorosa’e UNTL João Soares Martins deklara simu ona relatoriu husi Dekana Fakuldade Medicina Siensia Saúde relasiona ho asaun greve ne’ebé halo husi asosiasaun akademica estudantil hasoru FMCS iha loron 12 Maiu 2025.
Iha entrevista ho Reitor Universidade Nasional Timor Lorosa’e João Soares Martins hateten, haree ba kazu ne’ebé akontese iha loron 12 Maiu tinan ida ne’e iha Fakuldade Medicina Siensia Saúde ne’e horiseik Dekana Fakuldade lori ona relatoriu entrega ona iha Reitor nia fatin iha loron 13 Maiu 2025.
“Ha’u simu ona relatoriu husi Dekana Fakuldade Medicina Siensia Saude, hanesan Reitor ha’u sei haree ba iha problema ne’ebé akontese iha Fakuldade ne’e rasik no aban ka bainrua ha’u sei koalia ho estrutura Fakuldade Medicina nian hodi haree ba iha problema refere.” Dehan Reitor UNTL João Soares Martins
Nia dehan importante liu mak husu ba estudante sira tenke hatene sira-nia dever mai atu estuda, nune’e bele aumenta imi nia koñesimentu hodi bele lori nasaun Timor-Leste ne’e ba oin, tanba imi estudante mak jerasaun kontinuador hodi kontinua luta ba dezenvolvimentu nasaun ne’e nian.
“Problema sira ne’ebé ita-boot sira koalia ne’e tenke mai ho nia baze ka dadus ruma hodi bele aprova karik iha medida ruma bele resolve.” Hatutan Reitor Universidade Nasional Timor Lorosa’e João Soares Martins
Nia subliña liután, hanesan estudante defama ema iha publiku ne’e laloos no Universidade sei halo prosesu ruma ba sira ne’ebé defama Dosente balun nia naran iha publiku seim hatudu prova ruma katak ema sira ne’e komete duni kazu ne’ebé sira hateten ba publiku.
“Ha’u sei analisa relatorio ne’ebé simu ona husi Dekana Fakuldade no karta husi Senadu ne’ebé mai ona iha reitor nia fatin no hanesan ohin ha’u dehan katak sei enkontru ho estrutura Fakuldade Medicina nian atu nune’e bele haree no tetu, se nesesita bele halo prosesu ba oin ita sei kontinua prosesu ba oin maibé agora ha’u seidauk foti desizaun ruma.” Subliña Reitor UNTL
Atu esplika kle’an liután katak relasiona ho komunikadu imprensa ne’ebé hala’o husi asosiasaun akademika estudantil Fakuldade Medicina Siensia Saude ne’ebé hala’o durante loron rua, Reitor Universidade nasional Timor Lorosa’e deklara katak simu ona relatoriu husi Dekana FMCS no Reitor sei enkontru ho estrutura Fakuldade hodi haree ba kazu refere.
Reportajen : Domingas
Foto : Domingas