Dili, 19 Maiu 2025 (Média Democracia) – Maria Domingas Fernandes Alves hanesan feto lutador ba ukun rasik-aan iha biban ne’e hato’o nia mensajen murak ba preparasaun atu selebra loron restaurasaun independensia 20 de Maiu ba dala-23 iha Timor-Leste.
Nia dehan agradese tebes ba Maromak no rai lulik Timor-Leste nomos herois da patria hotu ne’ebé partisipa hahú luta iha momentu ne’ebá, nia partisipa ativamente iha prosesu dezenvolvimentu liu-liu iha tinan 23 nia laran, nia sempre koalia beibeik katak ema barak partisipa iha luta populasaun Timor-Leste.
“Kuaze tinan tolu ha’u iha ai-laran ema barak partisipa iha luta, kuandu ema partisipa hotu iha ona objetivu iha kna’ar obrigasaun tantu feto ho mane sira hatene katak oinsá ita atu servisu ba Timor-Leste nia ukun rasik-aan, ita-nia dezenvolvimentu ba ita-nia rain oinsá konstrusaun estadu nian.” Dehan Maria Domingas Fernandes Alves
Nia hatutan agora iha ona konstrusaun Estadu dalabarak husik liu tinan barak molok hakfodak ukun rasik-aan ba tinan 23, maibé iha legislasaun XI governu kria orgaun ida atu promove feto iha nivel governu hahu husi gabinete promosaun igualidade to’o iha Sekretaria Estadu Igualidade, parlamentu nasional partisipasaun feto hanesan deputada persentajen husi partidu politiku rasik, iha ONG lokal no internasional barak lidera husi feto.
“Ita haree akontese labarik barak eskola maibé produladu ita haree katak iha fali re-porsesu tanba populasaun joven aumenta lalais, ami sira ne’ebé hahú luta mai to’o prosesu ukun rasik-an preokupasaun Indonesia parte ida Timor nian lakoi sai ba rai liur maibé ita hetan tia independensia joven barak mak hakarak sai ba rai liur tanba kestaun empregu entaun ita hree joven ba rai liur hakarak servisu nune’e bele muda sira-nia moris.” Nia haktuir
Feto sira-nia partisipasaun mós importante hanesan iha organizasaun sosiedade sivil grupu tarjetu, maibé sira nia kontribuisaun suku no aldei la organizadu hanesan tempo uluk nian iha luta ba independensia.
“Tempu luta nian ema hotu-hotu organizadu ho sistema rotativu katak sistema ida ne’ebé ema hotu sei partisipa iha grupu hanesan halo to’os no fai akar hetan benefisiu sei fahe ba parte tolu, ida fahe ba falintil, rua fahe ba ita hotu, tolu fahe ba familia, tanba ita organizadu. Maibé agora independensia iha suku no aleida la halo ona hanesan tempu uluk no ema ida-idak preokupa ba nia moris.” Nia hateten
Nia informa ohin luta ona ba tinan 23, hanesan mós ema, bainhira idade 23 bele forma ona familia hanesan mós ita-nia nasaun tuan ona entaun tenke rekoñese problema saida mak sei falta, oinsá bele hadia di’ak liután hahalok no atetude sistema konvivensia familiar maibé respeita no ajuda malu.
“Ita heree ba dezenvolvimentu rai laran iha xineza barak tama to’o ona iha area rurál entermus ema atu haree sasan inklui daudaun ne’e estrada komesa di’ak no ita komesa sente ona. Agora saida mak ita sempre hateten beibeik preokupasaun ita-nia mudansa maibé ita haree agora igreja no kapela barak loos ona ida ne’e hatudu katak iha mudansa.” Nia informa
Nia subliña desde primeru governu kedas partisipa ona iha prosesu atu kria Munisípiu nune’e aprezenta ona feto hotu iha Timor-Leste. Tanba ita-nia preokupasaun mak feto sira tenke paresipa iha fatin ruma no hetan liberdade.
“Ohin loron ita rona feto sira ne’ebé iha tempu luta hetan vitima nafatin ho vitima alin sira ne’ebé padrastu fó isin rua problema sira ne’e tanba saida mak akontese Fokupers mós simu krime hanesan violensia sexual aman fó oan barak los ne’ebé ita la hatene fenomena ida ne’e tanba sa mak sempre akontese, formasaun no edukasaun sivika mak menus ba ema.” Nia reafirma
Nia afirma ema sente demokrasia liberdade ba ema hotu-hotu ne’e impaktu abertura husi dijitalizasaun hanesan ema uluk sama atensaun ba sira katak kuidadu ho dijitalizasaun tanba ne’e iha liberdade ba buat barak mak akontese entaun ema hotu-hotu nia kna’ar presiaza sama atensaun nune’e labele akontese tan iha futuru.
Mensajen ikus ba ita hotu responsabilidade hanesan sidadaun feto, hein katak ita iha vida anin sei huu ita tenke koalia no hatudu pratika di’ak tanba governu no estadu tenke tau estrutura atu haree, maibé depende mós ba ema ida-idak nia vontade hakarak kumpri ita iha susesu, se ita lakoi entaun ita mak lakon oportunidade.
Reportajen : Nelfiano
Foto : Nelfiano