Dili, 22 Maiu 2025 (Média Democracia) – Provedóriu Direitus Humanus no Justisa (PDHJ) husu Komandu Jeral Polísia Nasionál Timor-Leste (PNTL) atu halo investigasaun kle’an kona-ba membru polísia ne’ebé deskonfia tiru joven Ronaldinho no halakon joven ne’e nia vida, akontesimentu konfrontu ne’e iha Posto Cailaco.
Providor Direitus Humanus no Justisa Virgilio da Silva Guterres ‘Lamukan’ hateten, PDHJ nia delegasaun teritórial iha loron (Tersa) fó informasaun jerál kona-ba akontesimentu ne’e, sira informa katak hafoin to’o ospitál médiku sira halo intervensaun maibé la konsege salva joven Ronaldinho.
“Bainhira ita rona informasaun hanesan ne’e, ita laran triste liu tanba implika joven ne’e ke kanek, no mate, ha’u la hatene oinsá maka nia mate, maibé primeiru bá ha’u la menta ho situasaun ida-ne’e, ita hein katak Komandu Polísia Nasionál Timor-Leste (PNTL) hola ona medida atu halo investigasuan kle’an bá membru siguransa hodi hatene loloos situasaun ne’ebé akontese iha Postu Cailaco.” Dehan Providor Direitus Humanus no Justisa Virgiligo da Silva Guterres ‘Lamukan’ hateten bá Jornalista sira iha Muzeum rezisténsia Dili Kuarta-feira semana ne’e
Lamukan hatutan, agora PDHJ hein katak ema dehan kazu ne’e akontese tanba intervensaun membru polísia nian, maibé buat hotu-hotu hein rezultadu investigasuan, tanba husi investigasaun ne’e foin hatene motivasi kazu ne’e loloos.
“Relasiona ho kazu ne’ebé akontese, haree kona-ba maneira atu tiru ka sona, Providor sente triste tanba joven ida mate. Laiha nesesidade atu ema ida mate iha selebrasaun ka eventu Nasionál hanesan 20 de Maiu restaurasaun Independénsia ba dala-23.” Dehan PDHJ
Nia informa, buat ida ne’ebé Providor hanoin, mak kapasidade estadu ninian atu garantia seguransa bá komunidade iha rai doben ida ne’e, kapasidade estadu ninian, autoridade seguransa nian atu identifika potensial konflitu ne’ebé akontese.
“Problema ida ne’e kuandu ita hatene ona identifikasaun potensial konflitu ita iha kapasidade intervensaun hodi prevene. Karik ita hatene katak iha Cailaco ne’e, iha grupu arte marsiais oioin, ne’e katak ita potensial atu konflitu. Entaun ita-nia medida atu halo intervensaun mós ita hatene ona.” PDHJ haktuir
Nia afirma kazu ne’ebé akontese ona, maske PDHJ lamenta ho situasaun ne’e, maibe sira husu bá komandu jerál polísia atu halo investigasaun husi parte PDHJ nia mós haruka ona delegasaun territorial, hein katak kazu ne’e sei halo investigasaun ho diak.
Esplika liután realasiona kazu ne’ebé akontese iha Munisipiu Bobonaro Postu-Administrativu Cailaco, hamosu komfrontu entre grupu rua iha selebrasaun aniversariu loron nasionál restaurasaun independénsia 20 de Maiu ba dala-23, nune’e halakon joven ida nia vida no deskonfia husi membru polisia tiru. PDHJ husu atu halo investigasuan kle’an atu hatene loloos kona-ba kazu refere.
Reportajen : Nelfiano
Foto : Nelfiano