Dili, 26 Maiu 2025 (Média Democracia) – Movimentu Tane A’as Lian Suku Katrai-Kraik MOTALIS realiza konferensia imprensa relasiona ho deklarasaun Administrador Postu-Administrativu letefoho katak, kualidade hanesan Administrador Postu la fó espasu ba movimentu ki’ik ida hanesan MOTALIS atu halo diálogo ho Autoridade sira iha Suku no Postu-Administrativu letefoho.
Porta-voz Lião Soares hatete, Movimentu Tane A’as Lian Suku Katrai-Kraik MOTALIS hakarak klarifika ba públiku espesialmente ba Autoridade lokal no Entidades hotu inklui sivitas akadémikus hotu iha Postu-Administrativu Letefoho katak, Movimentu nia ezistensia laos atu impede kualkuer tipu dezenvolvimentu, maibé movimentu nia ezistensia ho objetivu ida katak atu halo kontrolu sosial ba kualkuer tipu dezenvolvimentu ne’ebé integradu no bele garante nia sustentabilidade ba tempo naruk iha Suku Katrai-kraik.
“Ligadu ho diskursu Administrador Postu-Administrativu Letefoho nian iha ambitu komemorasaun aniversariu restaurasaun independensia Timor-Leste ba dala XXIII iha Postu-Administrativu Letefoho, Administrador hateten katak kualidade hanesan Administrador Postu la fó espassu ba movimento ki’ik ida hanesan MOTALIS atu halo diálogo no movimentasaun em termus de kritika autoridade sira iha Suku no Postu-Administrativu Letefoho.” Dehan Porta-voz Lião Soares
Nia informa Movimentu Tane A’as Lian Suku Katrai-Kraik MOTALIS deskorda totalmente ho Administrador nia diskursu ne’ebé hato’o katak, kualidade hanesan Administrador Postu la fó espassu ba movimento ki’ik ida hanesan MOTALIS atu halo diálogo no movimentasaun em termus de kritika autoridade sira iha Suku no Postu-Administrativu Letefoho, Administrador movimentu ne’e ki’ik hanesan Administrador nia haree, maibé nia vizaun bo’ot no estratéjiku tebes atu kontribui ba kualkuer tipu dezemvolvimentu.
“Movimentu Tane A’as Lian Suku Katrai-Kraik MOTALIS lamenta tebes ho diskursu Sr. Administrador Postu-Administrativu Letefoho nian ne’e, la fundamenta no la komprimenta ba konstituisaun RDTL iha artigo 40 númeru 1. Hateten katak sidadaun hotu-hotu iha direitu no liberdade atu hato’o informasaun no simu informasaun ne’ebé lolos nian, subliña mós iha númeru 2. liberdade kolia no informasaun ninian labele hetan limitasaun husi sensura ruma.” Informa Porta-voz Lião Soares
Porta-voz hatutan Administrador la komprimenta mós ba dekreito lei númeru 5/2005 ne’ebé atribui kompetensia ba pessoa koleteiva ne’ebé iha boa voantade atu hari’i movimentu no assosiasaun sira ne’ebé ho natureza hanesan Organizasaun naun Governamental, ho estatutu hanesan Assosiasaun Nasional e Voluntariamente Sem Lukrativu no Sem Partidaria, ho hakarak hari’i paz no estabilidade hodi kontribui ba prosesu de dezenvolvimentu nasional.
Husi konferensia ne’e MOTALIS hakarak husu ba :
- Iha Administrador nia diskursu hateten katak la fó espasu ba movimentu ki’ik hanesan MOTALIS atu labele halo Movimentasaun ein termos de ajente do kontrolu sosial iha suku Katrai-Kraik no Postu-Administrativu Letefoho, maibé konstituisaun RDTL tuir artigu hirak ne’ebé ami sita ona iha leten kaben mós ba dekreitu lei ne’ebé mensionadu iha leten mak fó espasu ba MOTALIS atu hala’o nia kna’ar nu’udar ajente do kontrolu sosial kaben mós ba três pilares akadémikas”Edukasaun, Peskiza, Dedikasaun Komunitaria, MOTALIS mai ho lema Tane’e a’as Lian ba Lian Lae’k sira nian hodi buka lia lo’os no justisa.
- MOTALIS propoin Administrador tenke le’e konstituisaun RDTL, lei no dekreitu lei sira ne’ebé agora dau-daun vijente hela iha ita-nia nasaun Republika Demokrátiko de Timor Leste. MOTALIS propoin nafatin Administrador tenke klasifika didi’ak terminolojia ba liafuan Konstrusaun no Alargamentu atu sosiedade bele hatene lo-los.
- MOTALIS atu hateten ba Administrador katak alargamentu ho distansia kilométro 8km hahu husi Aimeta ba Manukoliria no Baulisuria ne’e laos konstrusaun maibé ne’e alargamentu ka expansaun ba dalan atu luan, se konstrusaun signifika katak kompaña CCECC foin loke ka foin konstrui fali dalan ne’e, maibé estrada rural ne’e antes komunidade asesu tiha ona.
- MOTALIS hakarak klarifika ba públiku relasiona ho konferensia imprensa ne’ebé halo iha loron 8 fulan maiu tinan 2025, sita kona-ba liafuan subornu bazeia ba faktus ne’ebé MOTALIS asesu liuhusi Autoridade Nasional Minerais (ANM) hanesan tuir mai, tanba fatuk ida Asdan ne’e Xefe Suku Katrai-Kraik nia Kompaña join venchor ho Kompaña CCECC hodi fahe persentajen Kompaña Lokal mak Katrai Unp.Lda no xefe Suku nia Kompaña hetan 51% kompaña internasional CCECC hetan 49%.
- MOTALIS orgullu ho kompaña CCECC ne’ebé rekoñese iregularidade iha akordo anterior, depois iha loron 22 de maiu 2025 mais ou menus tuku 05 Htl. kompaña refere hamutuk ho Amu Pároko no Amu Vigario Paroquia Letefoho tun direitamenta ba fatin alargamentu hodi esplika ba Autoridade lokal no veteranus inklui komunidade iha fatin alargamentu area manukoliria nian, kompaña CCECC konkorda ona atu reve fila-fali hodi sita ezizensia hirak ne’ebé MOTALIS propoin atu anexa mós iha akordo revizaun ne’e.
Reportajen : Domingas
Foto : Domingas