Dili, 10 Fevereiru 2026 (Média Democracia) – Diretór Ezekutivu Fundasaun Mahein (FM) Nelson Belo kestiona kapasidade Ministru Interiór Francisco da Costa Guterres ne’ebé laiha kapasidade, tanba lakohi rezolve problema ne’ebé akontese iha Rekrutamentu Vaga ba PNTL foun.
Diretór Ezekutivu Fundasaun Mahein (FM) Nelson Belo hateten, Ministru Interior laiha kapasidade, tanba lamentasaun sira mai husi públiku, maibé Ministru Interiór podia lakohi rezolve problema ne’ebé akontese iha nia uma-laran, para bele esplika prosesu ne’e hanesan aspetu politika, labele dudu ba PNTL hodi fase liman no lakohi responsabilidade.
Diretór Ezekutivu hatutan, Ministru Tenke asume nia kna’ar hodi foti desizaun, labele hein Konsellu Ministru mak foti desizaun.
“Ministru tenke asume nia kna’ar katak, desizaun ne’e nia persiza tenki foti, lalika hein Konsellu Ministru. Desizaun foti bainhira iha alegasaun mosu iha publiku maka’as, entaun ida ne’e konkista atensaun politiku sira, entaun Ministru podia halo desizaun, tanba saida tenki ba Konsellu Ministru.” Dehan Diretór Fundasaun Mahein hafoin enkontru ho Komandante Jeral PNTL, Komisáriu Jerál Polísia Henrique da Costa iha Kuartel Jeral PNTL Caicoli, Tersa ne’e (10/02)
Tanba ne’e Fundasaun Mahein kestiona kapasidade Ministru Interiór Francisco da Costa Guterres liuliu oinsá atu foti desizaun mesak hodi solusiona polemika vaga rekrutamentu membru PNTL foun.
“Desizaun atu suspende ka anula ne’e tanba saida mak tenki hein Konsellu Ministru, tanba saida mak Ministru hotu-hotu tenki hein desizaun Konsellu Ministru, entaun Ministru hotu-hotu la hatene halo desizaun, tanba sira lori ba Konsellu Ministru mak halo desizaun ba sira. Tuir lolos Ministru ne’ebé kompotente sira tenki halo desizaun, sira labele enak-enak de’it, buat oituan-oituan sira lori ba Konsellu Ministru mak halo desizaun ba sira, ida ne’e di’ak los ba Ministru sira. Karik Konsellu Ministru mak halo desizaun ba problema refere, signifika katak Ministru laiha kapasidade.” Afirma Diretór Fundasaun Mahein
Konsellu Ministru ne’e haree asuntu sira, mais estratejiku, mais abrajante, tanba ne’e Ministru Interior la presiza lori problema ne’ebá Konsellu Ministru. Tanba kestaun rekrutamentu ne’e buat kiik, no Ministru bele uza nia kompétensia hodi rezolve ida ne’e, la presiza lori ba Konsellu Ministru.
Reportajen : Estefania
Foto : Estefania