Dili, 05 Marsu 2026 (Media Democracia)-Prezidente Institutu Nasional Kombate HIV-SIDA, Daniel Marçal husu deskulpa ba Autoridade Lokál no Komunidade Suku Leo-Lima tanba halo adiamentu ba Sosializasaun Informasaun ba suku refere ho razaun mota tun ho volume as halo ekipa INCSIDA no Autoridade Munisípiu no ekipa servisu saúde Bobonaro labele ultrapasa tanba korrente bee boot no laiha ponte atu Liu.
Prezidente INCSIDA Daniel Marçal hatete, em nome INCSIDA hato’o deskulpa boot ba xefe suku ho nia komunidade no autoriedade Bobonaro no parte saúde sira.
“Ita hotu la hanoin atu kansela, ita trasa ona planu mai to’o iha suku Leo-Lima, to’o iha ne’e dezastre ka dezafiu boot, labele hakat liu mota, Xefe Suku esforsu tebes, ami hotu esforsu maibé haree ba risku, mota ita labele halimar, udan ita labele prediksi tanba ne’e em nome de INCSIDA hato’o deskulpa boot tebes ba Xefe Suku ho nia komunidade no autoridade Bobonaro sira iha ne’e nomós parte saúde.” Dehan Prezidente INCSIDA ba jornalista sira iha Suku Leo-Lima kuarta ne’e (04/03/2025)
Nia dehan, maske kansela maibé loron ida sei fila fali mai hodi hasoru komunidade sira iha Suku Refere.
“labele dezanima, loron ida ami sei to’o fali iha ne’e, Xefe Suku fuan moras tebes, triste tebes haree inan sira husik ona servisu loron tomak mai hein, maibé ita labele hasoru malu tanba de’it mota ne’ebé boot, susar tebes ita atu prediksi, ita atu ba di’ak se udan boot mota tun, ita mai halo nusa, komunidade atu hakat liu mai maibé ita labele halo buat ida, udan boot ita atu tur, rona halo nusa, depois fila atu fila fali halo nusa no dehan katak mota ne’e lori ona ema na’in rua ona ne’ebé ita evita risku sira ne’e.” Nia afirma
Iha biban ne’e, Reprezentante Prezidente Autoridade Munisípiu Bobonaro, Domingos da Costa haktuir Autoridade Munisípiu Prezidente INCSIDA no Xefe Suku deside kansela sosializasaun iha suku refere.
“komunidade atu mai iha sorin ne’e labele hakat mai, depois ekipa atu hakat ba mós labele tanba ne’e hamutuk deside Xefe Suku, Prezidente INCSIDA, Autoridade Munisípiu hanesan sekretáriu Finansas nomós Na’i Liurai deside dehan katak kansela maibé ita triste tebes kuandu ita kansela tanba informasaun atu hato’o ba komunidade liliu moras HIV-SIDA, tanba programa sensibilizasaun ne’e la’o mós ho hasai ran.” Nia dehan
Iha sorin seluk, Xefe Suku Leo-Lima, Rui Moniz Ferreira triste tanba ho kondisaun estrada at no mota boot hodi desidi kansela programa sosializasaun ne’e.
“atividade ohin loron loloos importante atu hala’o maibé ita-nia kondisaun estrada no ponte mós laiha, entaun ho momentu ida hanesan ne’e komunidade sira husi aldeia 4 mai atus rua resin obrigamente tenke fila fali tanba prezidente no Autoridade ami kansela tanba nia prezudika no risku ba mota ne’ebé dadaun iha ita nia oin.” Nia Salienta
Autoridade Lokál ne’e triste tabes tanba Ekipa INCSIDA husi nasionál atu fahe informasaun ba komunidade sira ligadu ho ema nia saúde liliu ba moras HIV-SIDA mas la konsege tanba mota boot prejudika halo kansela no adia ba tempu seluk, triste tebes tanba prezensa komunidade 200 resin tenke fila fali.
Reportajen : Estefania
Foto : Estefania