Dili, 24 Marsu 2026 (Média Democracia) – Fokupers hamutuk ho Rede Advokasia kompostu husi Sosiedade Sivil mai ho komitmentu no luta kontra desigualdade no violénsia hasoru feto no labarik feto iha Timor-Leste.
Tuir Porta-voz Natalia De Jesus hateten, Fokupers rekoñese katak alargamentu violénsia hasoru feto no labarik feto kontinua aumenta nia numeru ne’ebé makas no lori preukupasaun bo’ot ba sosiedade sivil no komunidade tomak hanesan Violénsia doméstika, kazu tara-an, abuzu seksual, violasaun seksual, liu-liu kazu omisidiu ne’ebé foin dadauk akontese.
“Fokupers hamutuk ho Rede Advokasia hato’o preukupasaun no lamenta tebes ho atendimentu foin lalais ne’e husi kazu omisidio ne’ebé akontese iha data 21 Março 2026 iha area Pantai Kelapa loja Seara nia oin, Ami konsidera katak situasaun hirak ne’e hatudu frakeza iha resposta institusionál, liu-liu iha área prevensaun, no protesaun ne’ebé falta Fortalesimentu Protesaun ba Vítima iha asaun imediata hodi asegura, proteje no halo referal bainhira feto iha risku ne’ebé grave.” Dehan Porta-voz Natalia de Jesus
Porta-voz ne’e informa, Fokupers mós preukupa kona-ba situasaun feto ne’ebé hasoru violénsia iha sira nia moris loron-loron, iha familia, komunidade no sosiedade ne’ebé kontinua fó sala feto bainhira feto hasoru violénsia, tanba de’it nia hatais, isin nakonu ho tato no lao kalan. ne’e laos razaun atu hetan violénsia ho kualker forma no hakotu ema nia vida.
“Ami anota katak kazu omisidiu ka femisida iha prosesu judisiário lao kleur, laiha transparénsia no akuntabilidade, nune’e implika atu violénsia kontinua repete no akontesese iha moris familia, komunidade no sosiedade.” Informa Porta-voz Natalia de Jesus
Entretantu Estadu Timor-Leste garante no defende nia sidadaun sira iha instrumentu legais ne’ebé forte tebes no ratifika instrumentu Internasional sira hodi asegura justisa ba feto sira no garante seguransa ba sira nia moris.
Reportajem : Estajiadu Marito
Foto : Marito