Dili, 31 Marsu 2026 (Média Democracia) – Komandante Jerál Polísia Nasionál Timor-Leste (PNTL) Komisáriu Asisténte Afonso dos Santos informa, durante nia mandatu hanesan Komandante Jerál polísia, membru Governu laiha direitu halo intervensaun ba serbisu Polisia nian, tenke hetan autorizasaun husi Komandante jerál PNTL liuliu hili membru korpu seguransa pesoál (UEP).
“Atu ba eskoltu ne’e tenke hetan autorizasaun husi Komandu se lae labele, Lae eskoltu ne’e ita termina, eskoltu ne’ebé bem formadu, nia hakarak eskoltu mai treinu lai iha UEP, treinu remata depois mak koloka.” Afonso dos Santos hateten ba jornalista sira bainhira halo vizita ba Unidade Espesiál Polísia (UEP) Bairo Pite segunda (30/03/2026)
Komisáriu Afonso hateten, iha nia mandatu Governu laiha intervensaun iha servisu polísia, liliu bainhira atu hili eskotu tuir nia família.
“Membru governu barak hili tuir nia família ne’e isto não ejiste, Afonso nia tempu laiha Governu halo intervensaun iha polísia laran, ha’u mak komandante ha’u mak deside ida ne’e mak loos, membru Governu bele propoin maibé ha’u mak deside la’ós Membru governu. Aleinde ne’e mós ha’u lakohi rona komandante ida atu ba enkontru ema polítiku, ha’u rona ida ha’u hasai kedas.” Informa Komandante Jerál Polísia Nasionál Timor-Leste (PNTL) Komisáriu Asisténte Afonso dos Santos
Entretantu Komandante Jerál PNTL ne’e husu ba membru UEP sira hotu atu labele kria razismu no ko’alia polítika iha instituisaun Polisia liliu Unidade Espesiál Polísia no labele kria grupuismu no familia rismu, kuandu Komandu hetan sei hasai.
Reportajen : Estefania
Foto : Estefania