Díli, 25 Juñu 2026 (Media Democracia) – Juventude Rezisténsia hato’o nia tristeza kle’an no sentimentu laran moras ba faleseimentu saudozu eis-Prezidente Repúblika, Francisco Guterres Lú-Olo, ne’ebé konsidera nu’udar aman funu-na’in ida, herói nasionál no líder ida ne’ebé dedika nia moris tomak ba servisu ba povu no nasaun Timor-Leste.
Tuir Juventude Rezisténsia, José Nunes Lopes, hateten katak iha momentu ida-ne’e povu Timor-Leste lakon figura importante ida ne’ebé durante tempu naruk hala’o nia funsaun tuir Konstituisaun no hatudu preocupasaun boot ba unidade no estabilidade nasaun nian.
“Ohin, ami husi Juventude Rezisténsia mai presta ami nia sentimentu triste no laran moras tanba lakon ita nia aman funu-na’in ida, herói nasionál ida no líder nasionál ida ne’ebé durante tempu naruk dedika nia-an ba servisu ba nasaun no povu Timor-Leste,” dehan Juventude Rezisténsia, José iha Farol (24/06/26)
Nia afirma tan katak, perda ne’e la’ós deit sente iha hanoin, maibé mos iha laran no sentimentu juventude sira, tanba Lú-Olo husik hela memória no legadu ida ne’ebé importante ba futuru nasaun nian.
” Durante tinan 24 resin independénsia, Lú-Olo kontinua kontribui ba dezenvolvimentu Timor-Leste liuhusi kna’ar importante sira hanesan Prezidente Parlamentu Nasionál no Prezidente Repúblika. Durante períodu hirak-ne’e, nia hatudu lideransa ne’ebé haraik-an, pasénsia no responsabilidade atu enfrenta desafiu polítiku no sosial oioin ne’ebé nasaun hasoru. Durante mandatu Prezidente Repúblika iha tinan 2017 to’o 2022, Timor-Leste hasoru situasaun polítika ne’ebé komplikadu, maibé Lú-Olo kontinua hala’o nia papel ho responsabilidade no respeitu ba orden konstitusionál.” Nia Dehan
Iha oportunidade hanesan, Juventude Rezisténsia mos hato’o mensajen ba jerasaun foun no veteranu sira atu hametin unidade no solidariedade nasional. Tuir José, unidade entre jerasaun sira importante tebes atu define objetivu no diresaun ne’ebé loos ba futuru Timor-Leste.
“Nu’udar juventude, ami husu atu ema hotu kontinua kaer metin prinsipiu rezisténsia no aprende husi sofrimentu ne’ebé ita nia aman sira hasoru durante luta libertasaun, hodi garante futuru ida ne’ebé di’ak liu ba nasaun no povu Timor-Leste,” nia hateten
Juventude Rezisténsia hato’o omenajen no respeitu aas ba saudozu Francisco Guterres “Lu-Olo”, no promete atu kontinua rai metin valor patriotizmu, unidade no servisu ba povu ne’ebé nia husik hela.
Descansa iha dame, Aman. Ita boot nia servisu no sakrifísiu sei moris nafatin iha memória povu Timor-Leste nian.
Reportajen: Juliana/Leozalia
Foto: Juliana