Dili, 01 Jullu 2026 (Media Democracia)- Tribunál Judisiál Primeira Instánsia Dili (TJPID) iha Tersa ne’e (30/06) kontinua halo interogatóriu judisiál dahuluk ba arguidu na’in -61 ba kazu Scaming Centre ne’ebé iha loron sexta (26/06) polísia detein arguidu na’in-61 hala’o atividade ilísitu scheme iha konstrusaun ida iha área Tibar Postu Administrativu Bazartete Munisípiu Liquiça foin lalais ne’e.
Iha interogatóriu dahuluk ne’e, Tribunál hala’o tiha ona faze alegasaun. Iha alegasaun ne’e, Ministériu Públiku liuhusi Prokuradór Matias Soares husu ba Tribunál atu aplika medida kausaun Prizaun Preventiva ba arguidu ho inisiál D, tanba konsidera katak iha indísiu no faktu sufisiente ne’ebé hatudu katak arguidu envolve iha atividade scam call center ne’ebé deteta iha área Tibar.
Nune’e ba arguidu na’in-60 seluk, Ministeriu Públiku husu ba Tribunál atu aplika medida kausaun administrativa (jaminan). Tuir pedidu ne’e, kada arguidu tenke selu osan kausaun (uang jaminan) hamutuk montante US$ 2 ba Tribunál, no mós sujeitu ba medida koasaun aprezentasaun Periódika, ne’ebé obriga sira atu marka an tuir prazu no kondisaun ne’ebé Tribunál determina.
Interogatóriu dahuluk ne’e, defeza husi arguidu na’in-60 hato’o nia alegasaun, no husu ba Tribunál atu aplika medida koasaun Aprezentasaun Periódika ba kada arguidu, ho obrigasaun atu marka an iha Eskudra Polísia ne’ebé besik liu ba hela-fatin, kada fulan dala ida.
Enkuantu ba arguidu ho inisiál D, defeza husu ba Tribunál atu aplika medida koasaun ho forma kausaun osan ho montante US$10.000. Defeza argumenta katak arguidu ne’e deit mak manejer husi fatin ne’ebé PNTL halo operasaun buska no apreensaun.
Iha oportunidade ne’e, defeza mós husu ba Tribunál atu konsidera fila-fali pedidu husi Ministeriu Públiku kona-ba aplicasaun medida koasaun kausaun ba arguidu na’in-60. Defeza husu atu, karik bele, Tribunál determina montante osan kausaun ne’ebé ki’ik liu husi US$2.000 ba kada arguidu.
Depois de rona alegasaun husi parte hotu-hotu, Tribunál deside adia interogatóriu dahuluk ne’e ba loron Kuarta (1/7), atu fó oportunidade ba Tribunál hato’o despaisu ikus kona-ba medida koasaun ne’ebé sei aplika ba arguidu sira iha kazu ne’e.
Arguidu na’in-61 ne’e, Ministeriu Públiku (MP) liuhusi Prokuradór Matias Soares promove ho imputasaun krime haat, mak hanesan krime Asosiasaun Kriminoza, previstu iha artigu 188 husi Kodigu Penal; krime Esplorasaun Ilísita ba Jogu, previstu iha artigu 322 husi Kodigu Penal; krime Brankamentu Kapitál, previstu iha artigu 313 husi Kodigu Penal; no krime Fraude Fiskál, previstu iha artigu 314 husi Kodigu Penal.
Prosesu interogatóriu dahuluk ne’e prezide husi Juíza Turnu Ersília de Jesus. Ministeriu Públiku (MP) reprezenta husi Prokuradór Matias Soares, enkuantu arguidu sira hetan asisténsia jurídika husi advogadu privadu na’in-rua.
Entretantu, Kazu ne’e Ministériu Públiku rejista ho NUK:227/26.PNSIK.
Reportajen : Estefania Cardoso
Foto : Estefania Cardoso