Dili, 11 Agostu 2026 (Media Democracia)- Polísia Nasionál Timor-Leste (PNTL), liuhusi Diresaun Servisu Investigasaun Kriminál (DSIC-sigla portugues) kumpri mandadu detensaun no buska, hodi detein suspeitu JFdA iha Ainaro.
Liuhusi informasaun ne’ebé Media Democracia asesu iha pájina ofisiál PNTL hatere katak, Mandadu detensau no buska ne’e husi Tribunal Judisiál Primeira Instánsia Dili ho NUC: 0014/25. PGGCC, no detein suspeitu ho inisiál JFdA iha loron sábadu (08/08) haleu tuku 14.02 iha aldeia Lebumera, Suku Foho-Ailiku Postu Administrativu Hatu-Udu, Munisípiu Ainaro.
Asaun detensaun no buska ne’e hala’o bazeia ba mandadu husi autoridade jidisiária, tanba indísiu forte kona-ba alegasaun katak suspeitu JFdA iha involvimentu ba krimi falsifikasaun dokumentu ka notasaun téknika agravada ne’ebé prevé iha artigu 303 no artigu 304, alinea 1, kódigu penál Timor-Leste.
Hafoin DSIK kumpri mandadu detensaun no hala’o buska iha rezidénsia suspeitu remata no kontinua kedas transporta suspeitu mai Dili hodi kontinua submete ba prosesu investigasaun iha edifísiu Diresajn Servisu Investigasaun Kriminál, Kuartel Jerál PNTL, Caicoli.
No kontinua asegura suspeitu iha sela detensaun durante oras 72 molok aprezenta ba Tribunal Judisiál Primeira Instánsia Dili atu hala’o interrogatóriu no foti desizaun tuir dispozisaun lei.
Nune’e iha loron segunda, (10/08/2026), Tribunál Judisiál Primeira Instánsia Dili, hafoin hala’o prosesu interrogatóriu, deside aplika medida koasaun Termu Identidade no Rezidénsia (TIR) no Aprezentasaun Periódika (AP) ho obrigasaun ba suspeitu atu aprezenta-an dala ida kada fulan iha edifísiu komandu PNTL ne’ebé besik.
Tanba ne’e Polísia Nasionál Timor-Leste (PNTL), liuhusi Diresaun Servisu Investigasaun Kriminál (DSIC-sigla portugues), kontinua hala’o servisu investigasaun kriminal bazeia ba mandatu no prosedimentu legal, ho respeitu ba direitu no garantia fundamentál ema hotu, no asegura katak prosesu investigasaun no justisa la’o tuir lei.
Fontes informasaun: Pájina Ofisiál PNTL