Dili, 07 Novembru 2026 (Media Democracia) – Xefe Estadu-Maiór Jenerál FALINTIL-Forsa Defeza Timor-Leste (F-FDTL), Tenente-Jenerál Domingos Raul “Falur Rate Laek”, konfirma katak membru F-FDTL ne’ebé envolve iha kazu agresaun fízika hasoru komunidade iha Munisípiu Liquiça, prosesu ona tuir lei ne’ebé vigora iha Timor-Leste.
Nia afirma katak, kazu ne’e la’ós de’it hetan tratamentu iha ámbitu administrativu F-FDTL, maibé membru sira ne’ebé envolve mós tenke responde ba prosesu jurídiku tuir prosedimentu legal ne’ebé aplika.
Antes ne’e, iha loron 1 Novembru 2026, akontese ona insidente agresaun fízika entre membru F-FDTL ho komunidade balun iha Munisípiu Liquiça, ne’ebé sai viral iha mídia sosiál.
“Ne’e prosesu la’o ona tuir lei ne’ebé vigora. Iha ámbitu administrativu, ami tenke foti pozisaun no aplika medida administrativa. Maski sira haruka ba tribunál atu responde ba prosesu, ita hotu-hotu iha lei nia okos,” dehan Falur Rate Laek ba jornalista sira, hafoin enkontru ho Sekretáriu Estadu Asuntu Toponímia no Organizasaun Urbana, iha Kuartél-Jenerál F-FDTL, Sesta-feira (06/11/2026).
Nia informa, iha loron antes, Ministra Solidariedade Sosiál no Inkluzaun, Verónica das Dores, mós hato’o ona informasaun ba nia kona-ba asuntu seluk ne’ebé envolve membru F-FDTL iha komunidade.
“Prosesu ida ne’e la’o ona. La’ós kazu ida ne’e de’it, iha kazu seluk mós. Ministra Solidariedade Sosiál no Inkluzaun mai hato’o informasaun ba ha’u katak iha forsa balun ne’ebé hala’o ezersísiu iha área komunidade nian, maibé la fó informasaun uluk ba komunidade sira. Tanba ne’e, ha’u haruka atu halo investigasaun no prepara relatóriu, hodi haree medida saida mak bele foti,” nia esplika.
Iha oportunidade ne’e, Falur mós apela ba membru F-FDTL hotu atu, bainhira akontese problema ka konflitu ruma ho komunidade, buka dalan atu rezolve liuhosi diálogu no tuir prosedimentu legal.
Nia enfatiza, ema hotu-hotu ne’ebé envolve iha problema, tantu vítima sira no autór sira, tenke hetan tratamentu tuir lei no prosesu ne’ebé justu, atu bele hetan solusaun ba problema ne’ebé mosu.
“Mensajen ha’u nian mak, ema hotu-hotu, tantu vítima sira no autór sira, tenke tau iha sira-nia fatin. Bainhira problema akontese, ita tenke buka dalan atu rezolve problema ne’e tuir prosedimentu no legalidade ne’ebé eziste, hodi kontribui ba solusaun,” nia konklui.
Reportájen: Pedrito & Estefánia Cardoso
Foto: Estefánia