Dili, 25 Marsu 2026 (Média Democracia) – Governu nomeia Komisariu Asistente Polísia Afonso dos Santos no Komisária Asistente Polísia Natércia Eufrazia Soares Martins lidera PNTL ba periodu 2026-2030.
Nomeasaun ne’e atu troka atuál Komandante Jerál PNTL, Komisáriu Jerál Henrique da Costa no Segundu Komandante Jerál PNTL, Komisáriu Polísia Pedro Belo hodi lidera Instituisaun PNTL.
Komandante Komando Operasaun Nasional PNTL, Afonso dos Santos hateten, nia la dúvida Natercia asume nu’udar segundu Komandante PNTL tanba iha kapasidade atu lidera.
“Ohhh..ne’e kapás tebebes, la’ós foin agora, ha’u mós presiza tanba maizu menus feto hanesan nia iha kapasidade atu halo’o buat barak.” Dehan Afonso dos Santos ba Jornalista liuhusi Via Telemovel iha loron kuarta (25/03/2026)
Nomeadu Afonso dehan bainhira governu nomeia nu’udar Komisáriu Jerál Polísia nia prontu atu serví no dezenvolve PNTL.
“Nomeasaun ida-ne’e ha’u hanoin Governu fiar ha’u nomea ha’u mós prontu atu servisu ida ne’e ona. Prontu atu dezenvolve PNTL. Yang pentin la’o diak, tanba ba buat ida hadia ne’e tenke prontu.” Informa Afonso dos Santos
Iha sorin seluk, Diretor Ezekutivu Fundasaun Mahein, Nelson Belo hato’o parabens ba nomeadu komandante jeral no segundo komandante ne’ebé hetan nomeasaun husi governu atu lidera PNTL.
“Espera komandante sira ne’ebe ke foin nomeia ne’e bele aposta ba reforma setor seguransa, nune’e mós halo instituisaun polisia ne’e bele instituisionalmente dezenvolve no alinamentu ho ASEAN Pool, tanba ita sai ona membru ASEAN nian.” Dehan Diretor Ezekutivu Fundasaun Mahein, Nelson Belo
Nia mós rekomenda ba komandante nain rua, iha sira nia mandatu prioridade dahuluk durante loron 120 sai urjente mak krime sira.
“Prioridade urjenti mak krime transnasional. Ita-boot sira hatene iha fulan hirak liubá krime jogu scame online iha oe-kusse no Dili ne’ebé ONU kestiona no rai bo’ot sira kestiona, ida ne’e importante.” Hatutan Diretor Ezekutivu Fundasaun Mahein, Nelson Belo
Nia mós husu atu komandante nain rua fó mós prioridadade urjenti ba iha krime sibernetika, persiza dezenvolve kapasidade polisia ba kombate krime refere. Liuliu komandante sira ne’ebé iha esperensia ba ida ne’e tenki aposta.
Ho nomeasaun segundo komandante jeral PNTL Natersia, nia konsidera, nomeasaun ida ne’e primeira vez iha istoria PNTL feto dahuluk asume posizaun, nune’e bele iha balansu di’ak ba dezenvolvimentu feto feminina PNTL nian.
“Ida ne’e nia bele dezenvolve femenina PNTL nian bele sai lisaun ba ASEAN sira, tanba membru ASEAN sira presentagem feto menus, tanba ne’e ita bele kontribui lisaun di’ak ho ita nia segundo komando jeral feto.” Subliña Diretor Ezekutivu Fundasaun Mahein, Nelson Belo
Tuir nia, kapasidade lideransa PNTL nain rua ne’e laiha duvidas, tanba segundo komandante jeral Natersia antes mós asume posizaun hanesan Komandante Munisipiu Dili nomos Komandante Administrasaun PNTL no atual diretora jeral servisu Migrasaun.
“Ha’u hanoin nia mos iha kapasidade naton atu bele beking komando jeral.” Afirma Diretor Ezekutivu Fundasaun Mahein.
Nune’e mos, Komandante Jeral PNTL, Afonso, antes ne’e hanesan komandante UEP no atual komandante operasaun, maibé nia iha kapasidade bele lidera PNTL di’ak.
Reportajen : Estefania
Foto : Estefania