Oe-cusse, 30 Janeiru (Média Democracia) – Asosiasaun Foinsa’e Sustentabilidade (AFOS) durante servisu hamutuk ho komunidade aldeia Hoi-neno suku Bobometo hodi suporta material no fahe formasaun oinsá bele kee bee debu no konserva bee nune’e iha tempu bailoro-naruk bee labele menus.
Komunidade aledia Hoi-neno Domingos Meta hateten, durante ne’e AFOS hanorin atu kuda ai-oan no konserva bee debu nune’e bele asegura bee matan labele maran no menus iha tempu bailoro-naruk nia laran tanba iha tempu uluk bee matan iha bailoro-naruk sempre menus no maran hodi afeita ba komunidade.
“Ami hasoru difikuldade mak kanu atu dada bee hodi fornese ba mai ami nia presiza loron-loron tanba daudaun ne’e kanu barak mak aat no tohar, entaun ami atu liga fila-fali la di’ak tanba xave laiha. Ami halo planu kada uma-kain tenke hatama osan $1.00 too 2.00 ba leten hodi hola kanu foun lori kanaliza di’ak fila-fali, nune’e bee bele fornese ba komunidade hotu.” Dehan Domingos Meta
Nia hatutan daudaun ne’e bee la menus ona tanba kada tinan komunidade iha aldeia Hoi-neno tomak sempre halibur malu hodi ai-oan ba kuda iha bee matan lopes tanba iha tempu uluk bee matan sempre menus impaktu husi ai hun boot laiha.
“Ami mós husu ba governu bele tau matan mai ami hodi hadia netik kanu sira ne’e, tanba durante ne’e ami komunidade rasik mak tau hamutuk osan hodi sosa kanu. Maibé kanu hirak ne’e ba oin aat tan ami laiha forsa atu hola tan ne’e duni nafatin husu ba governu tenke tau matan ba problema hirak ne’ebé durante ne’e ami infrenta iha areá rurál.” Dehan nia
Nia salienta tan durante ne’e AFOS mak suporta material balun hodi ajuda komunidade aldeia Hoi-neno liga ho problema bee moos, antes ne’e komunidade sira infrenta iha baze maibé ida ne’e seidauk naton tanba AFOS apoiu tuir forsa no kbiit ne’ebé iha no bee ne’ebé iha seidauk kobre hotu ba komunidade barak no balun hela dook husi bee moos.
“Foin daudaun ne’e ami koalia ho AFOS konserva tan bee matan ida, Maibé Afos hateten ba futuru ami sei apoiu material seluk maibé agora ami apoiu tuir forsa no kbiit ne’ebé iha, nune’e imi husu buat ne’ebé iha ami sempre apoiu maibé sasan ne’ebé laiha ami labele apoiu.” Nia haktuir
Nia afirma tan katak bee matan Lopes naran ida ne’e husi kedas bei-ala sira nia tempu, kada tinan sempre halo tuir kultura lori animal hanesan karau no fahi. Maibé animal hanesan bibi bainhira ne’e bee menus foin lori ba oho hodi hamulak ba natureza nune’e bee matan labele maran.
“Durante ne’e AFOS oferese ai-oan hamutuk atus-ida 100 too 1000 hanesan ainitas, oenini, bua no seluk tan. Ai-oan hirak ne’e kada tinan ami sempre lori ba kuda iha bee matan haat hanesan lopes, oeteka, putu no taekmanos.” Nia afirma
Benefisu husi AFOS durante ne’e mai fahe formasaun kona-ba oinsá bele kee bee debu iha foho, nune’e bee matan bele boot no forsa hodi bele fahe ba komunidade sira hotu. Tanba ami seidauk halo debu bee ne’e menus liu maibé ami hamutuk ho AFOS kee tia bee debu bee komesa boot to’o agora.
Iha fatin hanesan Diretor AFOS Francisco Cato hateten, AFOS halo intervensaun iha Suku Bobometo Aldeia neen halo introdusaun ba programa hambrik no diare iha atividade asaun iluminu, oinsá atu fahe formasaun ba komunidade liu-liu atu konserva rai no fini rejilente inklui konserva udan ben hodi hamoris bee matan.
“Antes ne’e komunidade sira debitu bee menus tebes, nune’e iha tinan primeiru ita halo asesmentu hamutuk ho komunidade hodi dezenvolve planu atividade kona-ba debitu bee atu aumenta bee, entaun tenke lasu bee kee rai kuak ho medidas naton 2×2 ka 5×5 iha bee matan nune’e udan monu rai bele infiltra ba bee matan sira.” Dehan Diretor AFOS, Francisco Cato
Nia hatutan katak iha atividade hanorin mós komunidade sira kee bee debu iha foho leten tuir medida naruk ho luan metru 5 karik tun husi metru lima mai krik bolu dehan rai kuak lasu bee
“Liga atividade durante ne’e dezenvolve hanesan kee bee debu ho medida ne’ebé boot, liuhusi atividade hetan ona benefisu no resultadu ne’ebé di’ak ba bee matan komesa boot hodi oferese ba komunidade sira nia presiza loron-loron.” Dehan nia
Nia afiram daudaun ne’e bee matan ne’ebé durante halo konservasaun hamutuk ho komunidade sira iha benefisu no rejultadu ne’ebé di’ak tebes. Maibé AFOS nafatin apoiu komunidade sira re-estabelese sistema bainhira kanu hetan estragus ruma kontinua halo rehabilitasaun, nune’e komunidade bele asesu nafatin bee moos.
Atu esplika kle’an liután katak iha suku Bobometo totál aldiea hamutuk 9 ho totál nia populasaun Uma-kain hamutuk rihun-sia atus-sia limanulu-resin-ida (9951) Sub rejiaun Oe-silo rejiaun espesial Oe-cuse Ambenu.
Entretantu, informasaun hirak ne’e Jornalista asesu liuhusi partisipa iha atividade media tour, ne’ebé Asosiasaun Jornalista Timor Lorosa’e (AJTL) servisu hamutuk ho OXFAM Iha Timor-Leste no hetan apoiu fundus husi Oxfam Hongkong.
Reportajen : Nelfiano
Foto : Nelfiano