Dili, 05 Marsu 2025 (Média Democracia) – Arsebispu Arkidioseze Metropolitánia Dili, Dom Virgílio Cardeal do Carmo da Silva, liuhusi nia Omília husu ba sarani sira iha tempu kuarezma atu halo orasaun, jezún no esmola hodi nune’e buat tolu ne’e bele lori ema ba hatene Maromak, lori ema hatene nia-maluk sira no lori ba rekoñese-aan
Dom Virgílio Cardeál do Carmo da Silva hateten katak, Kuarta feira sinzas, karau dikur nia lian ne’ebé makás, lian ne’ebé bolu ema hotu atu sé tilun no pauza iha ida-idak nia moris, lian ne’ebé konvida atu trava oitoan atividade loron-loron nian.
“Tanba dala barak ita halai tuir buat barak husi dader to’o kalan, segunda to’o sábadu, husi dia 1 to’o dia 30, husi janeiru to’o fali Dezembru dia 31, dala barak ita sibuk liu, dalaruma ita la hatene liu movimentu ne’e hotu ita atu ba los ne’ebé.” Dehan Dom Virgílio iha nia omília bainhira selebra misa eukaristia kuarta-feira sinzas iha Igraja Sé Katedral, Dili (05/03/025)
lian karau dikur ne’e bolu ema atu hanoin oituan kona-ba buat ne’ebé esensiál iha moris ida ne’e, buka atu la husik tuir de’it buat ne’ebé isin nia hakarak, tan ne’e lian karau dikur ninian ne’e la’os bolu ka hase de’it maibé atu fanu ita, se dukur karik, la’o ses dalan karik nia fanun ka hato’o mensajen ne’ebé ohin profeta dehan katak fila mai Maromak.
Bispo ne’e dehan bainhira ita bolu ema ida fila-fali signifika, la’o tuir dalan loos sei la’o ba oin nafatin.
“Bainhira bolu ita atu fila-fali, dehan katak ha’u keta halo la’o tuir fali dalan seluk la tuir dalan ne’ebé tenke tuir, tanba iha ita-nia viajen moris ninian, dala barak ita lakon ita-nia diresaun, ita lakon ita-nia meta, finalidade ka objetivu moris ne’e ninian rasik, tan ne’e dala ruma ita bele mós la’o lakon.” Dehan Bispo
Nia dehan koarezma mak tempu atu hetan fila-fali rota ka diresaun rumu moris nian tanba iha dalan bele dehan katak ema preokupa demais liu ho atividade no buat barak seluk
“Maibé buat ne’ebé vale liu, oinsá ita preokupa atu la lakon ita-nia meta moris nian, ita-nia finalidade moris nian, ita husu karik saida mak rumu ba diresaun, ita baruk, bele dehan katak ha’u nia diresaun meta moris nian mak ha’u hanoin kona-ba ha’u-nia saúde, balun hanoin kona-ba ha’u-nia kadeira, hanoin kona-ba buat ne’ebé bele akumula, buat ne’ebé bele hetan ne’e sai nu’udar dalan rumu moris, hakarak lakohi buat hotu ha’u halo, ida ne’e ha’u tenke hetan.” Nia dehan
Kuarta-feira Sinza ne’e iha buat furak barak ne’ebé ema hotu haree liliu bainhira hakbesik ba simu “Ahi Kdesan” ne’ebé tau iha ulun ka Ren Tos.
“Ahi Kdesan ne’ebé tau iha ita-nia ren toos ne’e sinál ida fó hanoin fali ita kona-ba lia loos ida mai ita, atu revela mai ita verdade ida, verdade mak saida? O halo an ho buat barak, o halai tuir buat barak husi dader to’o kalan maibé ikus mai saída mak hela, o kole ho buat barak maibé buat ida seluk keta halo folin laek, buat sira ne’e hotu keta ikus mai hanesan ahi kdesan, hanesan rai rahun ne’ebé anin hú lakon tiha de’it karik.” Esplika Bispo
Cardeal ne’e haktuir katak buat hirak ne’e hotu, pasajeiru, provisóriu, poder ohin ita iha aban liu, ohin susesu aban naben, tanba podér ne’e Pasa, susesu nabén, dala ruma moris iha sosiedade ida ne’ebé halai tuir kultura, bolu dehan kultura de aparensia, buat ne’ebé ema haree buat ne’ebé ema halo, buat ne’ebé virál.
Infelizmente dala barak ema monu ba tentasaun tanba buat hirak ne’e, saida mak bele hatudu, saida mak labele haree iha ema, ida ne’e kultura ida ne’ebé bele dehan hakarak ka lakohi buat ne’e iha ema hotu nia neon no iha hotu-hotu nia moris.
Dala barak obriga atu halo tuir buat ne’ebé ema halo, buat ne’ebé liu, buat ne’ebé bá no mai, dala barak mós monu ba buat ne’ebé lohi hela, kultura ida ne’ebé diabu lohi hela ema, ita kompara karik hanesan ahi-lakan, bainhira sunu ahi lakan makás ema hotu haree maibé ahi ne’e kuandu mate saida mak hela, rai rahun “Ahi Kdesan”, Tempu ida atu liberta-an buat ne’ebé ilusaun atu moris tuir “ahi kdesan” ida ne’e.
Tanba ne’e, kuarezma konvida atu deskobre fila-fali katak ema la’os ahi-kdesan, ahi ne’ebé lakan nunka mate, lakan nafatin atu lori mundu.
“Maromak la halo ita atu fila-fali ba rai, ahi kdesan ne’e folin laiha, nia halo ita ba eternidade, ita la’os rai ninian maibé ita lalehan ninian. Ita sai ema livre nia oan, liberdade ida, ita la’ós para atan.” Dom virgílio haktuir
Koareszma bolu fali ema ba situasau ne’ebé Esensiál no importante ba ema nia moris loron-loron.
“Tanba ne’e evangelho ne’ebé ita rona ne’e propoin mai ita buat tolu, atu ita ida-idak nu’udar evangellu ne’ebé husik hela mai ita mensajen furak, oinsá ita buka didi’ak ita-nia prátika hirak ne’e ho fuan ho laran la’ós finjimentu, la’ós ofisia kona-ba saida, esmola, orasaun zejún, no aptinénsia serve ba saida, benefísiu saida ba ita nu’udar sarani.” Nia hato’o
Esmola, orasaun no Zejún liga ema moris ba realidade ida katak, permanese ba nafatin, orasaun liga ema ba Maromak no lori ba fali Maromak, esmola lori ema ba ita-nia maluk sira, Zejún no aptinénsia lori fila-fali ba hatene ema-nia an, buat tolu ne’e la’os buat foun, ne’e mak realidade moris presija tinan-tinan konvida nafatin ema ida-idak atu loke nia neon ba realidade ida ne’e.
Reportajen : Estefania
Foto : Foti husi media sosial