Dili, 20 Janeiru 2025 (Média Democracia) – Autoridade Inspesaun no Fiskalizasaun Atividade Ekonómika no Sanitária (AIFAESA) realiza semináriu hodi “Desiminasaun Kódigu Konduta ba Funsionáriu AIFAESA” ne’ebé realiza iha salaun CNE.
Inspetora AIFAESA Odete Maria Viegas hateten, atividade desimina kódigu konduta ne’e atu hodi realiza ba planu AIFAESA ba tinan 2025 ne’ebé hahú hodi fahe informasaun kona-ba lala’ok instituisaun nian.
“Hanesan hateten ona katak ami buka atu hadi’ak uluk uma laran foin maka ami hala’o servisu, kódigu konduta ne’ebé sei aprezenta ne’e sei jerál liu haree ba iha aspeitu jerál liga ho disiplina funsionáriu sira iha AIFAESA ne’e rasik, maibé orsida aspetu espesifiku liu ami sei elabora iha kada diresaun, manual de traballu sira ne’ebé sei utiliza ida ne’e sei diskute kle’an liu.” Inspetora AIFAESA Odete Maria Viegas
Maibé hanesan giaun ne’ebé atu guia, la’ós ba funsionáriu de’it, hahú husi orgaun to’o iha funsionárius kraik atu bele hatene lala’ok administrativamenta iha instituisaun AIFAESA ne’e rasik.
Nia dehan tanba pesoal ne’ebé iha AIFAESA pesoál kontratadu hotu, dadaun ne’e aplika hela avaliasaun dezempeñu trimestral, nune’e ho deziminasaun informasaun ne’ebé hato’o, ohin ko’alia kona-ba kódigu konduta.
“Aban sei ko’alia kona-ba rejime infrasaun ne’ebé ko’alia sobre inspetór sira ne’ebé atu tun ba halo fiskalizasaun no halo monitorizasaun iha operadores ekonómiku sira estabelesimentu ne’ebé iha sira hatene ona, regra saida sira tenki kumpri no sira rasik tenke komprende katak servisu ne’ebé sira halo ne’e sira hatene muito bem atu nune’e to’o momentu públika tiha ona sira mós bele iha defeza ba sira-nia aan.” Nia dehan
Kódigu konduta ne’e hahú dadaun ona atu nune’e iha avaliasaun dezempeñu karik staff sira la kumpri regras, sira rasik hatene ona lala’ok se la kumpri tenke simu konsekuénsia saida mak superior hato’o ba.
Ida ne’e hanesan maneira ida ita atu hanorin malu, tanba hotu-hotu servisu ba rai ida ne’e, servisu ba estadu ida ne’e iha responsabilidade mak atu hala’o kna’ar ho profesionalismu no dedikasaun ne’ebé aas ho disiplina ba tempu nomos laiha violasaun iha instituisaun nia laran rasik.
Tan ne’e nia haktuir katak papél AIFAESA hanesan papél fiskalizadór ne’ebé atu halo monitorizasaun ba servisu ne’ebé liga ho ema barak nia papél liuliu ba iha protesaun konsumidores sira, entaun instituisaun buka atu hadi’ak uluk nia-aan liuliu pesoál ne’ebé hamahan-an iha institutu AIFAESA nian.
Iha biban ne’e Koordenadór Ministériu Koordenadór Asuntu Ekonómiku Jorge Martins haktuir ohin lansa serimónia ba semináriu kódigu konduta tanba AIFAESA hanesan instituisaun públiku ne’ebé bele iha padraun rasik.
“Klaru disiplina de traballu, disiplina de fiskalizasaun husi ofisiais iha kampu, para ema labele entende sala kona-ba AIFAESA nia Kna’ar no responsabilidade nu’udar fiskalizador no monitorizador ba asuntu alimentar ai-han no non-aihan.” Dehan Koordenadór Jorge Martins ba jornalista sira iha Salaun CNE segunda ne’e
Nia dehan, laos halo ida ne’e, maibé AIFAESA mós tenke bem preparadu nia rekursu umanu nian no tenke iha disiplina no obdensia estrutural la preokupa ho nia backraund atu doutor ka masteradu, kuandu hakna’ar-aan iha instituisaun ida, instuisaun iha ninia padraun rasik, laos dekreitu lei ninia estatutu, maibé iha ninia regulamentu internal ne’ebé jere lala’ok servisu kada pesoál.
“Bele sai nafatin matan dalan ou Pontus de avisu ida autoriza husi superior sira ba lalaok kada funsionariu, selae ita tur iha ne’eba Ita mak halo arbiru deit. Publiku hatene katak instituisaun governu mós naran forma no naran tau ema de’it, maibé tau ema servisu ho responsabilidade ho di’ak.” Deha Koordenadór
Tan ne’e Kódigu konduta ne’e hanesan matadalan ida atu jere pesoál ida nia lala’ok no atetude iha servisu fatin nia haknaar. Atividade semináriu deziminasaun kódigu konduta ne’e sei hala’o durante loron rua ne’ebé sei remata iha loron aban.
Enkuantu iha atividade refere hetan partisipasaun másimu husi Funsionáriu instituisaun AIFAESA nian, hahú husi kargu diretores, kargu xefia sira no funsionáriu ki’ik sira.
Reportajen : Estefania
Foto : Estefania