Dili, 14 Novembru 2025 (Média Democracia) – Assosiasaun Jornalista Timor-Leste AJTL apoiu liuhusi Sekretáriu Estadu Komunikasaun Sosial SEKOMS konklui atividade forum Dijital no “AI Literacy” ba estudante sira hodi bele aumenta koñesimentu, tanba Timor-Leste daudaun ne’e tama ona ba membru ASEAN. Atividade refere hala’o iha HAK Farol Kinta semana ne’e.
Prezidente Jornalista Timor-Leste AJTL, Zevonia Vieira hateten, forum literasia dijital ne’e hetan apoiu husi SEKOMS hodi fasilita formasaun ba estudante sira hodi hasa’e sira-nia koñesimentu kona-ba utiliza média dijitalizasaun nian
“Ami mós fasilita forum Literasi dijital no “AI Literacy” ba estudante sira hodi fahe kona-ba importansia husi literasia dijital no hasa’e koñesimentu hotu ba estudante bele komprende ba era dijital, tanba daudaun ita tama ona ba membru ASEAN. Nune’e estudante sira presiza hasa’e koñesimentu no abilidade kona-ba oinsa uza internet ho saudavel.” Dehan Prezidente Jornalista Timor-Leste AJTL, Zevonia Vieira
Prezidente AJTL hatutan, materia ohin loron sei fahe husi Prokuradór Direitus Humanus no Justisa, koalia kona-ba direitus umanus iha era dijital. Husi peskizadór hotu sei fasilita kona-ba Al no nia impaktu sira ba joven ne’ebé utiliza média sosial.
Assosiasaun Jornalista Timor-Leste sei fasilita kona-ba literasia dijital ba foinsa’e sira oinsa uza plataforma ne’e ho saudavel presiza hasa’e sira-nia koñesimentu bainhira sira utiliza dijital iha eskola.
Iha fatin hanesan Sekretariu Estadu Komunikasaun Sosial (SEKOMS), Expedito Loro Dias Ximenes, halo abertura ba atividade literasi mediatika no literasia dijital ba estudante sira, tanba ne’e importante ba joven sira mak futuru nasaun nian bele uza plataforma ho responsabilidade.
“Ha’u mai halo abertura ba forum dijital no literasia AI ba estudante sira ne’ebé IX governu konstituisional no organizasaun jornalista sira ohin mai iha ne’e. Objetivu husi forum dijital ne’e atu bele halo literasi mediatika no literasia dijital ba joven no estudante iha Munisípiu sira.” Dehan Sekretáriu Estadu Komunikasaun Sosial SEKOMS, Expedito Loro Dias Ximenes
Sekretariu Estadu hatutan, joven sira hanesan futuru nasaun nian bele uza plataforma ne’ebé iha hanesan facebook, twiter, youtube, google bele uza ho responsabilidade, tanba dadaun ne’e avansa teknolojia dala barak uza laho didi’ak, husi formasaun ne’e bele tulun estudante sira uza plataforma dijital ho responsabilidade di’ak tuir nia lalaok.
Hato’o mós mensajen ba komunidade tomak uza média sosial uza ho responsabilidade, etika no moral, dala barak ita aproveita espasu dijital hodi desfama ema balun. Maibé tenke uza plataforma dijital ba atividade servisu sira no seluk tan tenke tuir nia lala’ok.
Esplika liután fundus ba atividade ne’e hetan apoiu husi SEKOMS 8 mil resin, hodi implementa atividade fasilita formasaun iha Munisípiu Bobonaro, Liquiça no Dili. Ohin iha Dili AJTL konvida eskola sira hanesan 30 de Agustu, 12 Novembru nomos São José hodi tuir formasaun kona-ba forum dijital no Al Literacy.
Reportajen : Nelfiano
Foto : Nelfiano