Dili, 26 Juñu 2025 (Média Democracia) – Asosiasaun Jornalista Timor Lorosa’e (AJTL), hamutuk ho parseiru OXFAM, Alumi Parlamentu foin sa’e Timor-Leste (APFTL), Mata Dalan Institute (MDI), Timor-Leste Organic Fertiliser (TILOFE), Ermera Ai-kulat Mutin Organiku (EAMO) no Forum Juventude Defisiensia Ermera (FJDE), realiza atividade hodi lansa sentru midia diversifikasaun ekonomiku. Atividade ne’e hala’o iha salaun HAK, kuarta semana ne’e.
Prezidente Asosiasaun Jornalista Timor Lorosa’e (AJTL), Zeovonia Viera hateten, ohin realiza atividade ne’e AJTL hamutuk ho nia parseiru sira atu lansa sentru midia ne’ebé liga ho hametin servisu advokasia midia nian hodi promove foin sa’e sira iha setor produtivu sira iha Timor-Leste.
“Papel AJTL kontinua halo advokasia servisu hamutuk ho parseiru sira durante halo atividade ne’ebé produtivu tebes oinsá dezenvolve ekonomia rai laran uza setor produtivu. Entaun AJTL hamutuk ho parseru OXFAM lori Jornalista sira ba kobertura asuntu importante fó valor no promove joven lian laek sira iha área rurál hodi kontribui ba Estadu kria servisu ba sira-nia an dezenvolve iha uma laran nomos ativu tebes oinsá partisipasaun joven importante.” Dehan Prezidente Asosiasaun Jornalista Timor Lorosa’e (AJTL), Zeovonia Viera
Prezidente Asosiasaun hatutan setor produtivu sai fator importante iha Timor-Leste, nune’e bele halakon dependensia ba iha fundu petrolifeu, tanba kasu bayung undang sai preokupasaun boot ba Timor-Leste.
Asosiasaun Jornalista Timor Lorosa’e (AJTL) kontinua nafatin foti papel halo advokasia ho parseiru sira ne’ebé durante halo nia atividade ba setor produtivu hodi dezenvolve ekonomia iha Timor-Leste di’ak, liu husi setor produtivu no lokal.
Iha fatin hanesan Diretor Mata Dalan Institute (MDI), Estevanos Coli hateten, hanesan Mata Dalan Institute (MDI) ne’ebé hola parte mós iha atividade husi Asosiasaun Jornalista Timor Lorosa’e no membru AJTL sira ne’ebé divulga informasaun kona-ba prosesu dezenvolvimentu nian iha Timor-Leste.
“Ami hanesan Mata dalan institutu hola parte iha atividade halo parseiru ho Jornalista sira liu-liu membru AJTL, nune’e bele halo divulgasaun ba informasaun relasiona ho prosesu dezenvolvimentu nian iha rai laran. Atividade ne’ebé ita atu halo iha relasaun barak ho diversifikasaun ekonomia no promove joven ka foinsa’e iha abilidade no koñesimentu atu halo produsaun.” Dehan Diretor Mata Dalan Institute (MDI), Estevanos Coli
Diretor MDI ne’e subliña liután kona-ba produsaun sira ne’e atu ajuda sidadaun no komunidade sira iha reziliensia ba moris ekonómikamente haree liubá ai-han ne’ebé sufisiente ba sira atu bele sobrevive ba situasaun ne’ebé infrenta iha moris loron-loron.
Koordenador Projetu Hakfoun Alumi Parlamentu Foinsa’e Timor-Leste (APFTL), Domingos Belo M. De Jesus informa, Projetu Hakfoun aproveita hodi hametin relasaun husi grupu foinsa’e no membru governu nian, nune’e husi APFTL aproveita atu halo advokasia ba polítika husi públiku bele kria servisu no apoiu emprendedorismu sira iha rai laran.
“Ami iha Projetu Hakfoun APFTL aproveita bele hametin entre grupu foinsa’e produtivu sira nomos membru governu sira iha projetu Hakfoun APFTL iha oportunidade ne’e atu halo advokasia polítika públika sira bele fó ba Juventude sira hodi kria ba komunidade bele hetan servisu hodi apoiu emprendedorizmu iha Timor-Leste.” Dehan Koordenador projetu APFTL Domingos Belo M. De Jesus
Nia afirma husi projetu Hakfoun APFTL nian iha atividade 3 maibé atividade hahu la’o ona mak kapasitasaun ba grupu koligasaun agrikultura realiza iha Munisípiu 2 Ermera no RAEOA, oinsá grupu agrikultura bele halo intervensaun ba siklu Orsamentu Jerál Estadu. Aleinde ne’e iha atividade rua sei realiza iha loron Kinta no Sexta fulan ne’e iha fundasaun Oriente sei konvida grupu parseru hotu husi Munisípiu 12 inklui RAEOA.
Esplika liután lansa programa Midia sentru hanesan mahon ba Jornalista no parseiru hotu-hotu hodi halo atividade liuhusi parseiru hanesan MDI, APFTL, TILOFE, EAMO no FJDE atu ajuda Jornalista fahe informasaun ba governu Timor-Leste no Parlamentu Nasionál hodi tau orasmentu ba setor produtivu sira iha Timor-Leste.
Reportajen : Nelfiano
Foto : Nelfiano