Dili, 23 Juñu 2025 (Média Democracia) – Asosiasaun Jornalista Timor-Leste (AJTL) Hamutuk ho Organizasaun Nasoens Unidus ba Edukasaun, Siénsia no Kultura (UNESCO) hala’o workshop ho tema hasa’e reportajen klimatika iha Timor-Leste, workshop ne’e hala’o iha salaun HAK farol Dili, Sexta-feira semana ne’e.
Prezidente Asosiasaun Jornalista Timor-Leste (AJTL) Zevonia Viera hateten, UNESCO kolabora ho AJTL atu haforsa Jornalista sira oinsá buka informasaun ne’ebé detaliu liu kona-ba mudansa klimatika tanba ho mudansa la’os impaktu de’it ba ambiente maibé impaktu mós ba grupu vuneravel sira liu-liu iha area rural.
“Workshop ne’e hetan partisipasaun masimu husi jornalista nain 19 husi plataforma mídia Rádio, Televizaun, imprensa no online ho objetivu atu haforsa Jornalista sira oinsa buka informasaun no reportajen kle’an kona-ba mudansa klimatika ne’ebé akontese iha mundu liu-liu iha Timor-Leste.” Dehan Prezidente Asosiasaun Jornalista Timor-Leste (AJTL), Zevonia Viera
Nia hatutan iha fulan Juñu mundu komemora Loron Mundial Ambiental nian, entaun UNESCO kolabora ho AJTL hodi kontinua haforsa Jornalista sira oinsá halo reportajen kle’an kona-ba klimatika ne’ebe akontese iha mundu tomak liu-liu iha illa kiik oan sira ne’ebé hetan afeta maka’as hanesan Timor-Leste.
AJTL iha intensaun atu kontinua enkoraja Jornalista sira atu kobertura ba asuntu mudansa klimatika ne’ebé fó risku ba vuneravel sira hanesan feto, labarik, ema ho difisiensia, komunidade ne’ebé hela iha areá remota.
Nia afirma husi observasaun ida ne’e UNESCO hakarak apoio AJTL nune’e bele hasa’e numeru reportajen Jornalista kona-ba klimatika, tanba moniturizasaun ne’ebé UNESCO halo ita sei menus los kobertura ambiental iha Timor-Leste.
Iha fatin hanesan Formador Herry Sujardi hateten, mudansa klimatika ne’ebé la tuir nia tempu fó impaktu ba buat barak inklui mós ema tanba ne’e papel Jornalista nian importante tebes atu hala’o kobertura ba mudansa klimatika ne’ebé sempre akontese.
“Problema ne’ebé infrenta bo’ot liu iha mundu mak mudansa klimatika ho mudansa klimatika ne’e bele fó impaktu ba ekonomia sosiadade no buat hotu tanba ne’e liuhusi formasaun ne’e ha’u sei fó, oinsá Jornalista iha hanoin bainhira tun kobertura saida mak atu husu no oinsá bele buka informasaun sira ne’e tenke kompletu no kritiku liu.” Dehan Formador Herry Sujaridi
Formador hatutan Jornalista mak matadalan hodi fahe informasaun ba publiku ho publikasaun Jornalista nian públiku fiar liuhusi media kompara ho media sosial tanba media tuir regra sira, no midia mak sempre fó informasaun ne’ebé los.
Esplika liután workshop ida ne’e sei enkoraja jornalista sira hamutuk 19 mai husi plataforma midia hanesan Radiu, Televizaun, Imprensa no Online, nune’e sei prepara planu kobertura konjunta ida kona-ba impaktu mudansa klimatika nian ne’ebé sempre akontese hodi fó impaktu ba ambiente liu-liu ba ema nia moris loron-loron.
Reportajen : Nelfiano
Foto : Nelfiano