Dili, 14 Maiu 2025 (Média Democracia) – Asosiasaun Jornalista Timor-Leste AJTL servisu hamutuk ho Konsellu Imprensa KI estabele nota entendementu no relativa premiu jornalista Balibo five hodi komemora loron 16 Fulan outubro tinan ida ne’e hodi hanoin hikas fali jornalista nain lima ne’ebé mate iha Balibo five.
Iha entrevista ho Prezidente Asosiasaun Jornalista Timor-Leste AJTL Zevonia Vieira hateten, ohin loron Asosiasaun Jornalista Timor-Leste hamutuk ho Konsellu Imprensa kontinua halo istoria foun relasiona ho komemorasaun loron Balibo five ba dala limanulu nian ne’ebé hamate maluk jornalista internasional nain lima iha Balibo five ne’ebé sai hanesan inspirador ba Jornalista Timor-Leste hahu iha tempu invazaun, oinsa sira halo kobertura kona-ba violasaun Direitus Umanu ne’ebé akontese iha Timor, tan ne’e mak deside ona katak loron Balibo five ne’ebé monu iha loron 16 outubro sai hanesan loron liberdade imprensa liuliu sai hanesan istoria importante ba Timor liuliu ba Jornalista sira, tanba sira nia mate ne’e sai hanesan istoria ne’ebé inspira jornalista sira atu brani kritiku no brani atu hakerek lia loos.
“Ohin Loron AJTL ho KI konsege iha aprosimasaun ida ne’ebé diak, oinsa tinan ida ne’e AJTL entrega obra ba iha Konsellu Imprensa atu organiza eventu boot ne’ebé sei monu iha loron 16 outubro tinan ida ne’e, hodi selebra aniversariu ba dala limanulu ba maluk jornalista nain lima ne’ebé mate iha Balibo five liuliu iha fronteira.” Dehan Prezidente Asosiasaun Jornalista Timor-Leste AJTL Zevonia Vieira
Espera katak ida ne’e sai hanesan inisiu ne’ebé AJTL ho KI halo hodi inspira no enkoraja nafatin maluk jornalista sira atu hatudu obra ne’ebé diak kritiku hatudu lia loos, muda jornalista ninian hanoin kle’an liu kona-ba problema barak ne’ebé jornalista seidauk kee sai no liga ba iha Direitus umanu nian.
“Jornalista sira ne’ebé mate iha Balibo five ne’e sira uniku, tanba sira halo kobertura ba iha violasaun Direitus umanu no funu ne’ebé akontese iha Timor-Leste iha tempu okupazaun ida ne’e, servisu ida ne’ebé sira husik hela ba ita atu ita bele kontinua obra sira ne’e atu nafatin fó sai notisia kona-ba violensia ne’ebé hasoru Direitus Umanu no nafatin husu ba ita atu nafatin kontinua luta ba iha lia loos sei la mate, ne’e sai hanesan identidade ba Jornalista sira nafatin uza atu kontinua mai ho karakter ida ne’ebé independente husi media ida-idak nian.” Hatutan Prezidente Asosiasaun Jornalista Timor-Leste AJTL
Nafatin agradese ba iha Konsellu Imprensa ne’ebé fó fiar ba iha AJTL atu nafatin halo komunikasaun ho nasaun sira seluk no bele halo akordu ida ne’e hamutuk, nune’e nasaun sira seluk nomos nasaun Australia bele hatene katak jornalista nain lima ne’e sira nia istoria sai hanesan referensia ba Jornalista Timor-Leste.
Iha sorin seluk husi Prezidenti Konsellu Imprensa Otelio Ote hateten, desde inisiu to’o tinan kotuk Konsellu Imprensa organiza rasik atividade ne’e nu’udar responsabilidade ba iha Konsellu Imprensa.
“Tinan kotuk ita koalia ona ho Asosiasaun Jornalista sira tenke kontribui sai parte husi valor nasional liberdade imprensa ida ne’e no ita mós koalia kona-ba oinsa komisaun organizadora ne’e bele involve jornalista sira husi Asosiasaun Jornalista hanesan AJTL, TLPU, no UPJTL, nomos organizasaun sira seluk hare ba iha eventu ne’e, tanba ne’e ita hotu nia responsabilidade dezenvolvimento média no jornalista sira nian iha Timor Leste.” Dehan Prezidenti Konsellu Imprensa Otelio Ote
Nia hatutan eventu ne’e Konsellu Imprensa sei halo parseriu ho Asosiasaun Jornalista sira iha Timor-Leste, SEKOMS, nomos sei halo parseiru ho UNTL atu nune’e bele atinji objetivo ida ne’ebé dehan ona katak kada tinan jornalista sira tenke kontribui hotu ba eventu ne’e, Konsellu Imprensa mós hanoin ona katak sei halo mós parseiru ho Universidade Katolika Timor-Leste hodi fó formasaun teknika ba estudante sira haree liubá iha area jornalismu nian.
“Konsellu Imprensa nafatin hamrik iha ita-boot sira nia kotuk atu halo dezenvolvimentu ba ita-boot sira nia kapasidade jornalista profisional nian, atu koalia nafatin lialoos nomos nafatin kobertura ba iha area sira ne’ebé sente katak ida ne’ebá importante tebes ba ita-boot sira no ba publiku mós.” Hatutan Prezidenti Konsellu Imprensa
Nafatin husu ba jornalista sira atu sai jornalista profisional iha kareira atu nune’e nafatin sai jornalista independente ba iha area kobertura nian no husu ba media nain sira atu sai media ida ne’ebé profisional intelektual iha nasaun ida ne’e.
Esplika kle’an liután katak atividade ida ne’e realiza husi Asosiasaun Jornalista Timor-Leste AJTL nomos Konsellu Imprensa KI hamutuk ho jornalista sira hodi estabelese nota entendementu no relativa premiu jornalista Balibo five hodi komemora no hanoin hikas fali loron 16 outubro ba jornalista internasional nain lima ne’ebé mate iha Balibo five.
Reportajen : Domingas
Foto : Domingas