Dili, 07 Janeiru 2025 (Media Democracia) – Albino Barros idade hitu-nulu (70), husi Aldeia Lasaun, Suku Lasaun, Postu-Administrativu Atsabe, Munisipiu Ermera. Daudaun ne’e hela iha Raikotu no halo negosiu hahu ho osan $10 hodi fa’an modo no ai-fuan iha dalan ninin atu bele responde ba nesesidade loron-loron nian.
Haktuir Albino Barros katak, hahu halo negosiu ho osan $10 iha dalan ninin raikotu hodi bele responde ba loron aban nian no liu-liu familia uma laran nian.
“Ha’u hahu halo negosiu ho osan $10, hodi sosa sasan hanesan modo tahan no tomate sira, hafoin ba fa’an hikas fila-fali no osan funan ne’ebé ha’u hetan rai hamutuk hodi kontinua hola fila-fali sasan sira ne’e. Uluk ha’u sei fa’an iha karentina, SEATOU mai sobu tiha fatin entaun muda ba fali iha Manleuana, maibé fatin mak ladun di’ak no ema ladun sosa sasan tanba ami ne’ebé halo negosiante barak mak fa’an sasan hanesan de’it, no vendedores sira ladun sosa ida. Entaun ha’u deside fali muda fatin hodi fa’an fali iha estrada ninin. Osan hirak ne’ebé ha’u hetan loron-loron uza ba nesesidade uma laran nian de’it. Tanba ha’u nian oan hamutuk na’in sanulu resin-rua (12) no nain 2 mak mate falta na’in 10, daudaun ne’e sira harii uma ka’in ona.” Dehan Albino Barros iha Raikotu.
Nia haktuir liután katak, hahu halo negosiu ne’e iha tinan 2021 to’o agora no sei kontinua ba nafatin.
“Maske ha’u nia idade komesa avansadu ona maibé nafatin esforsu-aan hodi buka netik osan rahun maske labarak, maibé bele sustentan netik ba loron aban nian. Modo hirak ne’e ha’u hola husi negosiante Liquiça, Ermera no Aileu, modo sira fa’an futun neen $1 no ha’u fa’an fila fali futun ida 0,50 centavus nomos sasan sira seluk.” Dehan Nia
Nia salienta liután nafatin esforsu-aan servisu nune’e bele hetan netik rendimentu oituan hodi bele sustenta familia. Bainhira lá buka osan no se mak bele fó hodi responde ba necessidade loron-loron nian.
Reportajen : Tomas
Foto : Tomas