Dili, 15 Novembru 2024 (Média Democracia) – Autoridade Munisípiu Dili sei hadi’a dalan iha Santana Cruz nia laran tanba rate balun hakoi okupa dalan ne’ebé uluk iha. Lia hirak ne’e hato’o husi Prezidente Autoridade Munisípiu Dili Gregorio Saldanha bainhira partisipa iha serimónia selebrasaun loron Masakre Santa Cruz ba dala 33, iha Tersa feira ne’e (12/11/24).
Presidente ne’e esplika rate ne’e nia prosesu la’o neneik, nune’e mós estátua Sebastião Gama ba halo iha Portugál, entaun Autoridade hein de’it nia rezultadu.
“Agora buat seluk mak ita haree sei hadi’ak nafatin, la’ós rate de’it maibé ita sei haree mós dalan, nune’e bele fó espasu ba familia vizitante rate, Ita sei koordena ho família mak ita halo mudansa ba dalan refere.” Dehan PAM Dili ba jornalista Media Democracia iha Santa Cruz Dili
Nia dehan Autoridade Munisípiu Dili iha ona planu atu hadia dalan sira iha rate laran nune’e bele la’o livre, nia mós husu ba família sira atu koordena ho di’ak.
“Iha planu ona atu halo dalan sira ne’e hotu, dalan sira tuan uluk ne’e sei muda hotu para dalan ne’e iha para ita la’o ba mai livre hodi labele sama rate sira ne’e, entaun família sira tenki konkorda para ita muda rate sira ne’e halo fali fatin ketak tau fali Ruin sira, solusaun mak ne’e.” Nia dehan
Aleinde ne’e, Prosesu sira la’o hela, konsulta hela ho família sira, sei halo preparativu sira seluk hanesan prepara dezeñu, no halo fatin hodi muda rate hirak ne’e.
Nia salienta katak governu sei haree ba ba rate hirak ne’e, nune’e haree regulamentu hodi sosializa depois fatin prontu mak bele muda, maibé la’ós agora.
“Agora rate foun konsege ita foin iha Becusi ne’ebá seidauk hanoin tan, sei halo regulamentu mak foin gusur, bainhira nakonu ona labele hakoi iha Santa Krúz, iha dalan sira ne’e ita sei hasai sira ne’ebé uluk okupa dalan sira iha Santa Krúz laran ne’e ita sei hasai tanba ne’e dalan.” Nia salienta.
Hasai rate ne’ebé okupa dalan atu nune’e la’o ba mai la susar tanba dalan iha.
“Primeiru hasai rate sira iha laran ne’e, depois ita labele hasai de’it iha leten, segundu iha halo’ot tiha fatin ne’ebé prepara, ida seluk dalan ne’e iha asesu para ema tama sai, lae loron boot sira hanesan Finadu no 12 de Novembru ema la’o susar loos.” Dehan Gregório Saldanha
Entretantu Kona-ba finalizasaun Estátua ne’e komforme tanba ema ne’ebé prodúz la’ós iha Timor, maibé Autoridade propoin de’it ba Governu tanba ne’e kompeténsia polítika finanseiru governu nian, enkuantu komité 12 de Novembro hanesan benefisiáriu de’it.
Reportajen : Estefania
Foto : Credit foto, Pãjina Ofisiál PNTL