Dili, 10 Abril 2025 (Média Democracia) – Autoridade Nasional Minerais ANM I.P hala’o serimonia Asinatura Termu referensia (ToR) ho Departamentu Industria, Siensia no Rekursu sira husi Governu Australia, serimonia Asinatura Termu ne’e hala’o iha edifisiu ANM City8, fumento Dili.
Iha entrevista ho Prezidente Autoridade Nasional dos Minerais Rafael Danilson Magno de Arouju hateten, Ohin asina akordu ida entre Governu Australia no Timor-Leste liuhusi Instituisaun rua ne’e Governu Australia nian mak Departament of Industry, Science Energy and Resources (DISER) hamutuk ho Autoridade Nasional dos Minerais parte Governu Timor liuhusi Ministeriu Petroleu Rekursus Minerais asina akordu ida ohin haree liu oinsa atu hametin kooperasaun no kolaborasaun iha setor minerais ninian.
“Entaun akordu ida ne’e estabelese ho ninia objetivu atu servisu hamutuk entre parte rua liu-liu foka ba asuntu sira ne’ebé ligadu ho setor Minerais nian, husi akordu ida ohin ne’e hanoin katak parte rua Australia ho Timor-Leste sei servisu diak liu ba iha futuru no hametin relasaun servisu kooperasaun no kolaborasaun ida diak liután.” Lian-hirak ne’e hato’o husi Prezidente Autoridade Nasional dos Minerais (ANM), Rafael Danilson Magno de Aroujo
Nia hatutan husi akordu ne’ebé ohin asina ona ne’e estabelese mós ekipa Sekretariadu ne’e kompostu husi Governu Australia no Ekipa Timor nian, ekipa teknik sira ne’e mak sei sai ekipa ne’ebé jere hotu kualker programa husi parte rua aseita ona.
“Ita agradese ba Governu Australia liuhusi DISER ne’ebé ho laran luak tebes hakarak oferese ona fundus balun ba ita para bele organiza ekipa Sekretariadu ne’e bele funsiona no servisu diak liután, para programa ne’ebé parte rua aseita ona bele implementa ho diak.” Dehan prezidente
Nia akresenta fundu iha tinan ida ne’e Governu Australia aprova $150 mil para atu jere de’it servisu Sekretariadu ninian, nune’e ba oin atu lao oinsa, sekarik Governu Timor mós persija tau fundus maibé ba tinan ida ne’e husi DISER maka fó suporta barak, karik ba oin maka sei iha tan Programa ruma parte rua sei diskute tan oinsa para bele priense tan fundu.
“Ida ne’e akordu kolaborasaun ne’ebé nia durasaun nakloke ba kulaker tempu, kuandu parte rua sei iha boa fe ka fiar ba malu para hakarak atu servisu hamutuk ita sei mantein nafatin akordu ne’e ba iha future.” Informa nia
Iha fatin hanesan Deputy Head of Mission, Edward Wilkinson informa, Governu Australia liuhusi Embaixada Australia iha Timor-Leste liuhusi DISER hamutuk ho ANM I.P ohin asina ona akordu ida hodi hahu lansa kolaborasaun entre Timor-Leste ho Australia iha setor minerais nian, ne’ebé importante tebes ba Timor-Leste no Governu Australia, orgullu hetan oportunidade balun atu fahe esperiensia.
“Ami orgullu atu servisu hamutuk ho Timor-Leste liuliu iha organizasaun importante sira, ami sei kontinua servisu iha tempu naruk atu harii kapasidade iha setor importante ne’ebé fó benifisio ba nasaun Timor-Leste.” Dehan Deputy Head of Mission, Edward Wilkinson
Nia informa espera katak husi asina akordu ida ohin ne’e parte rua ne’e bele servisu hamutuk hodi bele fó resultadu ida ne’ebé diak ba iha futuru, lori Governu Australia nia naran agradese tanba bele servisu hamutuk ho governu Timor Leste liuhusi ANM I.P
Reportajen : Domingas
Foto : Domingas
Editor : Jp.Costa