Dili, 24 Juñu 2025 (Média Democracia) – Governu liuhusi Autoridade Protesaun Civil APC servisu hamutuk parseiru Organizasaun Ai-han Mundial (WFP) realiza workshop ho tema “Timor-Leste Haforsa Koordenasaun Lojístika ba Preparasaun Emerjénsia” atividade ne’e hala’o iha Hotel City 8, segunda semana ne’e.
Sekretariu Estadu Autoridade Protesaun Civil, Domingos Mariano Reis hateten, workshop ida-ne’e Autoridade Protesaun Civil servisu hamutuk ho parseiru Organizasaun Ai-han Mundial (WFP) hodi resposta emerjensia ba dezastre narurais nian ne’ebé akontese iha Timor-Leste.
“Ohin ita realiza workshop durante loron rua hodi kapasita ita-nia jestor no staff tekniku sira atu hasa’e sira-nia koñesimentu kona-ba jestaun lojistika hodi bele halo preparasaun ba resposta emerjensia dezastre naturais iha Timor-Leste.” Dehan Sekretariu Estadu Autoridade Protesaun Civil, Domingos Mariano Reis
Sekretariu Estadu hatutan workshop ida-ne’e sei realiza durante loron rua hahu husi ohin to’o aban (24/06/2025) no partisipantes husi kargu xefia APC, parseiru dezenvolvinentu, PNTL, no mós ajente liña Ministerial seluk ne’ebé relevante ho APC.
Aleinde ne’e kapasitasaun rekursu umanu ne’e importante hodi bele hasa’e sira-nia koñesimentu no jestaun bainhira akontese dezastre ho grau/eskala ne’ebé boot sira bele hatene ona maneira atuasaun ne’e rasik.
Iha fatin hanesan Reprezentante PAM/WFP iha Timor-Leste, Jacqueline de Groot hateten, realiza atividade hanesan parte ida esforsu ho hametin kapasidade nasionál atu hatán ba dezastre (APC) no Programa Ai-han Mundial Nasoins Unidas nian (PAM/WFP), apoiu husi Projetu Preparasaun iha Terrenu husi Kluster lojistika (FBPP), organiza ona Seminariu Preparasaun Lojistika Umanitariu daruak iha semana ne’e iha Kapital Dili
“Objetivu husi programa ne’e atu promove diskusaun kona-ba Kriasaun Grupu Servisu Tekniku Lojistika (KGSTL) ba Timor-Leste, atu promove sistema lojistika emerjénsia ida-ne’ebé koordenadu, efisiente no iha tempu loloos. Seminariu ne’e mós sei ajuda aliña asaun grupu traballu nian ho prioridade nasionál sira.” Dehan Reprezentante PAM/WFP iha Timor-Leste, Jacqueline de Groot
Nia hatutan Autoridade Protesaun Sivil, nu’udar lider ba koordenasaun resposta emerjénsia iha Timor-Leste, hala’o papél sentrál ida iha inisiativa ida-ne’e. “Timor-Leste hasoru risku oioin tanba nia jeografia no klima. Haforsa koordenasaun lojistika iha setór hotu-hotu ne’e importante tebes atu asegura no resposta emerjénsia ba kazu dezastre.
“Hodi investe iha koordenasaun lojistika emerjénsia ohin, Timor-Leste foti ona pasu konkretu sira hodi hamenus impaktu dezastre sira-nian iha tempu aban. Envolvimentu estratejiku ida ne’e mak faze importante atu harii sistema ne’ebé forte liu hodi salva moris no proteje maneira buka moris.” Dehan nia
Nia afirma dezeñu espesializasaun koletiva husi grupu atór neʼebé barak, diálogu nia objetivu forma dalan ba oin atu hetan koordenasaun lojistika emerjénsia ne’ebé efetivu liu iha Timor-Leste, atu garante ajuda efisiente no iha tempu loos ba ema ne’ebé presiza tebes iha tempu afeita dezastre.
Esplika liután seminariu daruak ne’e partisipante ema na’in 100 husi Governu, setór umanitáriu no sosiedade sivil, bazeia ba inisiativa sira uluk nian, hanesan Seminariu Dahuluk iha fulan Novembru 2024 no Ezersisiu Simulasaun Umanitariu (SimEx) ne’ebé hala’o iha fulan Dezembru 2024, ajuda identifika área kritiku sira atu hadi’a koordenasaun lojistika emerjénsia nian no estabelese faze kolaborasaun di’ak liután iha Timor-Leste.
Reportajen : Nelfiano
Foto : Nelfiano