Dili, 16 Juñu 2025 (Média Democracia) – Autoridade Protesaun Civil (APC) liuhusi ekipa Xefe Seksaun no Komunikasaun, relata dadus semanal kona-ba akontesimentu dezastre naturais iha Timor-Leste durante semana ida nia laran, konferénsia ne’e hala’o iha salaun APC Caicoli Dili, Segunda semana ne’e.
Xefe Seksaun Komunikasaun (XSK), Genoveva Fernandes Almeida hateten, iha loron 09-16 fulan Juñu tinan ne’e, durante semana ida, APC rejistu familia uma-ka’in hamutuk (22) hetan estragu husi dezastre naturais ne’ebé akontese iha Munisípiu neen (6) iha semana ne’e nia laran
“Durante akontesimentu dezastre iha Munisípiu neen, APC registu uma-kain ne’ebé latama kriteria apoiu de’it emerjensia uma 16, numeru uma ne’ebé priense kriteria hamutuk ualu no ema afetadu hamutuk nain (126) no ema mate 2, nune’e APC Munisípiu apoiu kedas emerjensia ba vitima hetan dezastre naturais.” Dehan Xefe Seksaun Komunikasaun (XSK), Genoveva Fernandes Almeida
Nia informa husi akontesimentu ne’e Autoridade Protesaun Civíl sira ne’ebé destakadu iha Munisipiu hala’o kedas verifikasaun ba dadus no fó mós ajuda ba vitima sira ho pakote emerjensia ne’ebé prepara ona iha kada Munisipiu ida-idak nian.
Atu esplika detallu ba iha dezastre ne’ebé akontese iha Munisipiu Baucau, Postu- Baucau Villa, Suku Bukoli Aldeia Lulik-Hein, akontese anin sobu uma 1 hetan estragu aat kaman no Postu Quelecai Suku Letemumo Aldeia Abu-matebian, anin sobu uma 1 no iha Aldeia Letenei anin sobu uma ida ho kondisaun aat kaman, Postu Venilale Suku Bahamori Aldeia Laku-uma anin sobu uma 1, Postu Baguia Suku Wakala Aldeia Uwakala anin sobu uma ida aat kaman inklui Suku Laresula Aldeia Lauhare akontese alin feto ida tara-aan dadaun ne’e mate isin hamutuk ona ho familia.
Nia hatutan Munisipiu Bobonaru, Postu-Administrativu Atabae, Suku Aidabaleten Aldeia Harame, akontese ahi-han komunidade nia uma 1 hetan estragu total, iha Munisípiu Ermera Postu Ermera Suku Talimoro Aldeia Moris-foun anin sobu uma 1 hetan apoiu emerjensia, no Aldeia Likisi ahi-han uma 1, iha Suku Poetete Aldeia Samatrae rai halai uma 1, Suku Mertutu Aldeia Railori anin sobu uma 1, iha Suku Laulara Aldeia Ervilhat anin sobu uma 1 hetan apoiu emerjensia.
Munisípiu Manufahi Post Alas Suku Dotik Aldeia Lakaluan akontese bee sae uma komunidade nian hamutuk 4, iha Suku Mahakidan Aldeia Tahu-ben bee sae uma hatumutuk 4, iha Suku Betano Aldeia Silihasan bee sae uma ida hetan apoiu emerjensia. Munisípiu Viqueque Suku Luka Aldeia Iramer akontese Lafaek tata ema 1 to’o daudaun buka seidauk hetan.
Nia relata iha Rejiaun Administrativu Espesial Oe-cuse Ambenu Sub Rejiaun Pante Makasar Suku Costa Aldeia Xanane ahi-han uma ida hetan estragu total, iha Suku Taiboko Aldeia Makelab anin sobu uma 1 hetan de’it apoiu emerjensia.
Nia reafirma durante akontesimentu ne’e Autoridade Protesaun Sivil rekolla kedas dadus no halo verifikasaun nune’e vitima sira hetan ona apoiu emerjensia nomos evakua ona vitima sira ba hela provizoriu iha komunidade balun ne’ebé la afeta ba dezastre, depois verifika dadus hotu APC sei fó apoiu material nomos imaterial ba vitima kazu dezastre naturais iha Munispiu ida-idak nian.
Reportajen : Nelfiano
Foto : Nelfiano