Dili, 03 Fevereiru 2025 (Média Democracia) – Autoridade Protesaun Sivíl (APC-sigla portugues) realiza konferénsia imprensa hodi atualiza situasaun desastre naturais durante semana ida nian hahú husi loron 27 fulan Janeiru to’o loron 3 fulan Fevereiru tinan 2025.
Iha Konferénsia imprensa ne’e Xefe Relasaun Externa Autoridade Protesaun Sivíl, Nelson Nunes de Orleans relata kona-ba relatóriu lista dezastre naturais kada semana iha territóriu Timor-Leste.
“Hahú husi loron 27 Janeiru to’o loron 3 fulan Fevereiru 2025, atu konfirma de’it relatóriu ba kada semanál iha rejiaun Timor-Leste normál, no akontese tipu dezastre husi parte CNOPC-APC rejista kazu dezastre hanesan Anin-boot sobu uma 7 no priénse kritéria ema na’in 5, apoiu de’it emerjénsia na’in 2.” Dehan Xefe Relasaun Externa Nelson de Orleans ba jornalista sira iha Edifísiu APC Caicoli, Dili, Segunda ne’e (03/02)
Númeru afetadu hamutuk 32, ema evakuasaun hamutuk 15 liliu Munisípiu sira hanesan tuir mai ne’e, Munisípiu Bobonaru anin somu-uma 1 iha suku Ritabou Aldeia Ritiudu (28/01/), Munisípiu Covalima anin sobu-uma 1 iha Suku Suai Loro Aldeia Akar Laran (28/01), Munisípiu Ermera anin sobu-uma 2 iha Suku Sare Aldeia Hohopu (10/01), Munisípiu Liquiça anin sobu-uma 1 iha Suku Guiço Aldeia Mau-Uno (30/01), Munisípiu Manufahi Anin sobu-uma 1 iha Suku Holarua Aldeia Tirilolo (27/01), Munisípiu Viqueque anin sobu-uma 1 iha Suku Caraubalo Aldeia Mane-haat (31/01).
Nia informa katak iha akontesimentu ne’e Autoridade Protesaun Sivíl ho ekipa sira iha rejiaun tomak halo kedas levantamentu dadus hodi fó asisténsia emerjénsia ba vítima dezastre naturais sira.
“Ekipa fornese kedas asisténsia emerjénsia ba família afetadu sira hanesan ai-han nomos la ai-han (food item & Non-food item), depois ida ne’e ekipa sira halo kedas levantamentu dadus atu haree liu parte husi afetadu sira atu monu ba tipu saida, ka ba iha tipu aat kamán, aat natón ka aat liu.” Nia informa
Nia haktuir katak depois ida ne’e mak sei fó sai ba iha komunidade sira atu hatene kona-ba atu hetan rekoperasaun ka la hetan, ne’e sei parte husi ekipa halo levantamentu dadus lai.
Iha biban ne’e Xefe Relasaun Externa APC ne’e afirma ba jornalista sira katak tinan ida ne’e Autoridade Protesaun Sivíl halo levantamentu dadus ba sira ne’ebé rejista atu tama ba rekoperasaun hamutuk 497.
“Ha’u atu hakarak hateten de’it, iha tinan ida ne’e ita iha levantamentu dadus ne’ebé APC rejista ona sira ne’ebé atu tama ba rekoperasaun hamutuk 497 mak tama ona rekoperasaun, atu prepara ba rekoperasaun tinan ida ne’e inklui Munisípiu hotu iha maibé la inklui mak Munisípiu Ermera.” Nia Afirma
Nia hateten, katak ba tinan ida ne’e Autoridade Protesaun Sivil (APC-sigla portugues), nia osan sei iha prosesu tama ba ezekusaun tinan ida ne’e, sei hein hela atu ezekusaun ba orsamentu hodi halo rekuperasaun ba uma hirak ne’ebé hetan afetadu tama ba iha tipu sira ne’ebé sei halo rekoperasaun ba sira-nia uma.
Autoridade Protesaun Sivíl (APC), rekomenda ba komunidade hotu katak, karik akontese udan boot, husu ba komunidade atu bele hasees-an husi fatin risku sira hanesan mota-ninin, foho-lolon, ai-hun boot, liña eletrisidade, rai dokumentu importante iha fatin ne’ebé seguru.
Karik iha kazu emerjénsia ruma, halo tuir orientasaun autoridade lokál ou Protesaun Sivíl ne’ebé besik karik presija halo evakuasaun, mantein kalma nafatin, buka fatin ne’ebé seguru no evita pániku.
Reportajen : Estefania
Foto : Estefania