Dili, 10 Fevereiru 2025 (Média Democracia) – APORTIL sei desloka hotu kareta sokato aat ba Tasi-tolu tanba durante ne’e para ho tempu naruk iha Portu Dili hodi okupa fatin transporte sira ne’ebé atu aranka ba Oe-cusse no Atauru.
Tuir Vogal I APORTIL.IP Julio Saldanha Bareto hateten, daudaun ne’e APORTIL servisu hamutuk Castam APORTIL hodi prepara fatin iha Tasi-tolu, nune’e desloka lixu hanesan kareta sokato aat no lixu seluk durante para kleur portu Dili, nune’e bele prepara estasionamentu ba transporte no privadu.
“Ami servisu hamutuk ho Castam hodi prepara fatin Draiport Portu Seko iha Tasi-tolu, nune’e bele muda hotu kareta sokato aat, trontong, esvator, ró aat no seluk tan, tanba durante ne’e ita haree lixu hirak sempre okupa fatin. Maibé antes ne’e ami haruka ona karta ba Castam nian, tanba buat hotu sei bazeia ba karta husi Primeru Ministru foin bele desloka sasan hirak ne’e.” Dehan Vogal I APORTIL.IP Julio Saldanha Bareto
Nia hatutan fatin ne’e hamamuk bazeia mós karta husi Primeru Ministru foin bele muda sasan hirak ne’e ba Draiport Portu Seko Tasi-tolu, tanba planu iha tempu badak nia laran sei prepara fatin ne’e ba estasionamentu iha futuru.
“Fatin ne’e iha tempu badak nia laran sei halo rekontrusaun ba estasionamentu hodi prepara ba kareta no motor sira ne’ebé sei viajen ba Rejiaun Espesial Administrativu Oe-cusse Ambeno REAOA no Atauru sei para hotu fatin refere, nune’e hodi prepara atu halo viajen.” Dehan Vogal I APORTIL.IP
Nia salienta APORTIL iha planu atu kria estasionamentu, tanba durante ne’e transporte publiku no privadu bainhira atu halo viajen ba Oe-cusse no Atauru sempre hamosu ingrafamentu iha portu laran, nune’e tenke halo estasionamentu kareta no motor para tuir ida-idak nia fatin
Vogal I APORTIL.IP esplika kle’an liután katak kareta sokato aat ne’ebé sei desloka ba Draiport Portu Seko Tasi-tolu tuir dadus ne’ebé iha hamutuk limanulu resin-rua (52), kargu eskavator hamutuk sanulu-resin (12) no kontentor hamutuk unidade sanulu-resin (12), Ro aat hamutuk rua (2) inklui sasan pezada sira seluk sei muda hotu, nune’e bele hamamuk fatin refere
Reportajen : Nelfiano
Foto : Nelfiano