Balibo, 03 Marsu 2025 (Média Democracia) – Prezidente Autoridade Munisípiu Bobonaro ne’ebé reprezenta husi Sekretáriu Autoridade Administrasaun no Finansas Munisípiu Bobonaro Domingos da Costa kestiona ho Autoridade balun ne’ebé lori feto husi Indonésia (Atambua) tama mai Timor bainhira iha atividade no festa ruma iha área Bobonaro, tanba deskonfia ultrapasa fronteira ilegál no konsidera lori moras mai iha Munisípiu refere.
“Hanesan Autoridade ami hatene risku, tanba kuandu festa iha Batugade ka Sanirin ne’e ema gosta hatete katak feto husi Atambua mai, loloos ne’e ita atu hatete katak moras husi Atambua mai, la’ós feto husi Atambua mai, tanba sira mai tiha, sira lakon iha festa ne’e, entaun sira ba ne’ebé? Ka sira ba fahe moras refere. Nune’e iha serimonia ha’u sempre kolia katak, ha’u la gosta imi lori ema tama sai livre ne’e.” Dehan SEKAAM I Munisípiu Bobonaro liuhusi nia intervensaun bainhita abertura atividade sensibilizasaun Moras HIV-SIDA iha Aldeia Palaca, Suku Sanirin Segunda ne’e (02/03/2025)
Reprezentante Autoridade afirma, Autoridade iha dever atu fó atensaun ba komunidade sira, bainhira atividade ruma iha Batugade no Sanirin sira mós tenke haree katak ema foun sei la mai tan, no joven sira tenke atensaun ba ema ema ne’ebé tama ilegal husi sorin nune’e bandu sira labele mai partisipa atividade iha Timor.
Iha fatin hanesan Prezidente Institutu Nasional Kombate HIV-SIDA, Daniel Marçal afirma, ho kondisaun ne’ebé Autoridade informa susar tebes atu kontrola sidadaun ne’ebé tama la liuhusi imigrasaun.
“Ema sira ne’e mai dalaruma la’ós liuhusi imigrasaun, liuhusi dalan sira ne’ebé ita labele kontrola ne’e, ema dalaruma tama mai ho ema nia par, ita mós dalaruma ba iha ne’ebá lori ita-nia par iha ne’ebá, ema ne’ebá halo festa dalaruma mai konvida ita iha ne’e, ita mós halo festa ba konvida iha ne’ebá, ita hanoin tok se ita ba ho ita-nia fen ka ita-nia laen, signifika katak ita ba no mai di’ak.” Dehan Prezidente INCSIDA Daniel
Prezidenti hatutan, bainhira halo viazen ho ema nia parseiru feto ka mane ne’ebé laiha relasaun domin tan de’it nesesida báziku (seksu livre) ne’e oinsá atu responsabiliza ba aktu sira ne’e.
“INCSIDA tinan ida ne’e primeiru mai iha fatin refere, tanba ita haree ita-nia Munisípiu ne’ebé risku liu mak Dili no Munisípiu Bobonar, depois Suai, Oe-cusse, Ermera no ikus liu mak Baucau. Kazu HIV ne’e kuandu sae makas signifika seksu livre mós makas, tanba transmisaun HIV ne’e liuhusi relasaun seksual.” Hatutan Prezidente Institutu Nasional Kombate HIV-SIDA, Daniel Marçal
Nia parte husu mós ba relijiozu sira atu apoiu mós morál hodi eduka sosiedade sira, tanba HIV-SIDA kauza husi moral, kuandu morál la di’ak bele monu lalais ba problema.
Prezidente INCSIDA mós agradese ba Autoridade Munisípiu Bobonaro, tanba sei akompaña ekipa halo sosializasaun ba komunidade iha Postu-Administrativu Balibo durante loron lima no atividade ne’e INCSIDA sei halo nafatin koordena ho Autoridade, nune’e ba oin sei kontinua sosializasaun ba suku sira ne’ebé viziñu ho fronteira Indonesia.
Enkuantu, Xefe Suku Sanirin, Francisco Reis Tavares hateten, informasaun kona-ba sidadaun husi nasaun viziñu tama ilegas hodi partisipa iha atividade ka festa iha Suku Sanirin ne’e laiha, tanba Autoridade halo kontrolu no lakohi virus ne’e hada’et ba nia komunidade sira.
“Festa ruma iha ne’e nu’udar Autoridade seidauk fasilita ita-nia maluk sira husi Indonésia mai iha ne’e, no seidauk akontese dala ida, ne’ebé buat ne’e informasaun para ita bele kombate ba aban bainrua labele akontese, ida ne’e mak nu’udar Autoridade nia kompeténsia.” Tenik Xefe Suku Sanirin Francisco Reis Tavares
Tanba ne’e Autoridade Munisípiu Bobonaro espera ho sosializasaun informasaun ne’e komunidade sira iha koñesimentu ba prevene no kombate HIV-SIDA iha sosiedade nia leet, nia mós husu ba INCSIDA atu kontinua sosializa ba suku seluk inklui iha Postu Maliana Vila liliu ba suku sira iha fronteira.
Reportajen : Estefania
Foto : Estefania