Dili, 10 Jullu 2025 (Média Democracia) – Instituto Nasional Combate Sida INCSIDA “sigla portugés” kontinua fahe formasaun ba komunidade liu-liu ba joven jerasaun foun sira kona-ba kombate hasoru virus HIV-SIDA iha Munisípiu Dili Postu-Administrativu Dom-Aleixu Suku Comora, atividade ne’e hala’o iha Kuarta semana ne’e.
Diretora Nasional Promosaun Prevensaun no Komunikasaun, Angelica da Costa Soares hateten, objetivu husi Instituto Nasional Combate SIDA (INCSIDA), halo sensibilizasaun informasaun ba publiku kona-ba risku virus HIV-SIDA. Tanba jovens barak iha rai laran menus tebes informasaun hodi abandona sira nia moris ikus sai risku ba moras HIV-SIDA.
“Atividade sensibilizasaun ne’e foka liubá komunidade jeral nune’e bele hatene karik moris iha risku nia laran, tenke hakbesik ba fasilidade saúde, nune’e bele halo teste ba ran hodi hatene lolos kona-ba moras HIV-SIDA. Tanba ita la halo tratamentu iha ospital entaun ita sei la hatene virus ne’e no ikus bele hakotu ita-nia vida.” Dehan Diretora Nasional Promosaun Prevensaun no Komunikasaun Angelica da Costa Soares ba jornalista sira
Nia hatutan, treinamentu refere hala’o nafatin tanba informasaun ne’ebé fó sai ona dalaruma komunidade sira haluhan no la preokupa ba virus refere, entaun tenke repete, nune’e sira bele hanoin nafatin hahalok ne’ebé durante sira komete ona no sira bele tau ona ba iha konsiénsia.
“Husu ba komunidade sira liu-liu ba jovens jerasaun foun sira karik eskola hela tenke fó tempu ba eskola no aprende, nune’e bele atinji mehi iha futuru, hafoin hanoin atu forma familia. Di’ak liu kontrola-aan hodi labele halo relasaun seksual arbiru hodi hamate imi nia mehi iha futuru.” Hatutan Diretora Nasional Promosaun Prevensaun no Komunikasaun
Iha fatin hanesan, Xefe Suku Comoro, Elijio José Marcal hateten, sente orgullu tebes ho prezensa INCSIDA nian ne’ebé sensibilizasaun ona informasaun ba komunidade sira iha suku Comoro, atu nune’e bele prevene-aan husi relasaun seksual livre hodi hadok-aan husi virus HIV-SIDA, tanba iha Timor-Leste daudaun ne’e virus refere kontinua aumenta maibé liuhusi formasaun bele hamenus virus refere iha komunidade nia leet.
“Ita haree sensibilizasaun informasaun ne’ebé INCSIDA fasilita iha suku Comoro ne’e importante tebes ba komunidade sira tanba husi informasaun ita asesu husi sentru saude katak jovens barak mak afeta ona moras HIV-SIDA iha Timor-Leste. Tanba ne’e husi ekipa INCSIDA sosializa informasaun refere sente orgullu ho sira-nia prezensa, nune’e bele halo kooperasaun di’ak liután.” Dehan Xefe Suku Comoro, Elijio José Marcal
Autoridade ne’e hututan, husu ba jovens jerasaun foun sira tenke hatene-aan, tanba jovens sira hatene katak seksu ne’e di’ak, maibé virus ne’e todan bele habadak imi nia vida jovens nian iha futuru hodi lakon buat hotu. Rona formasaun ne’e tau iha kakutak nune’e bele evita-aan husi relasaun seksual livre.
Esplika liután tuir dadus ne’ebé rekolla iha Munisípiu Dili liuhusi Sentru Saude hahú Fulan Janeiru to’o fulan Juñu 2025, iha Sentru Saude Becora kazu HIV-SIDA (20), Sentru Saude Comoro (66), Sentru Saude Vera-cruz (63), Sentru Saude Metinaru (3) no Sentru Saude formoza (234). Nune’e haree ba total husi Timor-Leste ba kazu HIV-SIDA hamutuk 2.300, entaun husu komunidade liu-liu ba jerasaun foun sira tenke hatene-aan hodi evita relasaun seksual livre no evita virus HIV-SIDA iha rai laran.
Reportajen : Nelfiano
Foto : Nelfiano