Dili, 15 Setembru 2025 (Média Democracia) – Relasiona ho manifestasaun ne’ebé hala’o husi estudante Universidade Timor-Leste, bankada nain tolu hala’o komunikadu imprensa hodi fó sira nian “Pozisaun husi Bankada CNRT, PD no KHUNTO nian relasiona ho Akizisaun Kareta ba Parlamentu Nasional hodi kansela sosa kareta.” Komunikadu refere ne’e hala’o iha resintu Parlamentu Nasional, Dili segunda-feira ne’e.
Iha komunikadu ne’ebe hato’o husi Bankada CNRT Duarte Nunes, Bankada PD Armando do Santos Lopes no Bankada KHUNTO Antonio Verdial de Sousa hakarak hala’o konferensia imprensa ida-ne’e atu esklarese ba públiku tomak kona-ba pozisaun Bankada Governu nian relasiona ho desizaun sosa kareta ba Parlamentu Nasional.
“Konstituisaun da Repúblika (K-RDTL) fó kna’ar importante 3 ba Deputados sira iha Parlamentu Nasional mak hanesan : a). Halo lei, b). halo fiskalizasaun ba aktus governativa no c). foti desizaun politika ba Estadu no Nasaun nian. 2. Estatuto dos Deputados ne’ebé aprova iha Primeira-Lejislatura (tinan 2004) mak define kona-ba Deputados sira tenke iha fasilidades hodi halao sira-nia misaun parlamentár, inkluindu transporte ne’ebé ho kondisaun adekuadu.” Liufuan ida de’it husi Bankada CNRT Duarte Nunes, Bankada PD Armando do Santos Lopes no Bankada KHUNTO Antonio Verdial de Sousa
Bankada CNRT, PD no KHUNTO kaer ba preokupasaun Deputados 65 nian iha VI Lejislatura kona-ba kondisaun kareta sira ne’ebé aktual Deputados sira uza hodi hala’o kna’ar, no husi sorin seluk mosu lamentasões sira husi parte Sekretariadu Parlamentu Nasionál kona-ba difikuldades jestaun kareta operasionál atu hátan ba nesesidades transporte ba Deputados sira, nomos lamentasões kona-ba kustu ba manutensaun kareta sira ne’ebé dadaun ne’e Deputados sira uza.
“Depois de halo leitura didi’ak ba situasaun sira ne’e maka, Bancada CNRT, PD no KHUNTO aseita atu aloka verba ba akizisaun kareta ba Parlamentu Nasional iha OJE tinan 2025 ne’ebé aprova iha fulan Novembru tinan 2024, atu bele hátan ba situasaun ne’ebé temi ona iha pontu 2 no 3 iha Komunikadu Imprensa ida-ne’e.” Hatutan Bankada CNRT Duarte Nunes, Bankada PD Armando do Santos Lopes no Bankada KHUNTO Antonio Verdial de Sousa
Bancada CNRT, PD no KHUNTO konsiente katak desizaun sosa kareta la reprezenta preokupasaun públiku nian, no hare de’it ba ezijénsia Deputados 65 no defikuldades ne’ebé Sekretariadu PN infrenta hodi hamosu tiha preokupasaun iha públiku, no ikus mai parte seluk esplora tiha nu’udar aproveitamentu politiku hodi hamosu instabilidade ba ita-nia País.
“Tanba-ne’e, tetu ba situasaun sira hotu, Bancada CNRT, PD no KHUNTO halo análize ba polémika sosa kareta, nomos haree katak própriu Deputados balun direta no indireta esplora situasaun ne’e nu’udar aproveitamentu ida ba sira-nia interese polítika partidária no grupo nian hodi instrumentaliza tiha emosaun públiku hodi halo instabilidade ba ita-nia rain.” Afirma Bankada CNRT Duarte Nunes, Bankada PD Armando do Santos Lopes no Bankada KHUNTO Antonio Verdial de Sousa
Liuhusi komunikadu imprensa ida ne’e haree mós ba iha aspirasaun husi sosiedade estudante nomos povu nian, nune’e Bankada CNRT, PD no KHUNTO deside hodi husu ba Parlamentu Nasionál atu kansela prosesu tomak kona-ba akizisaun sosa kareta ba Deputadu sira iha Parlamentu Nasional.
Reportajen : Domingas
Foto : Domingas