Dili, 16 Maiu 2025 (Média Democracia) – Boxista Timoroan “El-Tigre” ho naran kompletu Elidio husi klube Boxe Revolta susesu iha kareira iha mundu Boxe, hanesan boxista Timoroan ne’ebé oferese sintu dahuluk mai Timor-Leste, iha kompetisaun Internasionál X Promotion Boxe ne’ebé realiza iha Bali-Indonézia, Elidio to’o iha Timor-Leste Kinta semana ne’e.
Boxista Elidio da Conceição hateten, vitória ne’ebé nia hetan no oferese sintu ida mai rai doben Timor-Leste ne’e espesiál iha komemorasaun loron Restaurasaun Independénsia 20 Maiu hein loron balun tan Timor-Leste sei selebra ba dala 23.
“Ha’u agradese ba Maromak nia kbi’it tomak, agradese mós ba maluk Timoroan sira hotu ne’ebé apoiu maka’as mai ha’u. Iha kampiaun ne’ebé ha’u hetan la’ós ba ha’u de’it, maibé ba Timoroan ona hotu. Sintu ida-ne’e ha’u oferese ba loron nasionál 20 Maiu.” Dehan Elidio da Conceição
Nia dehan, sintu ne’ebé nia hetan la’ós ida ne’e de’it maibé ba futuru sei esforsu-aan nafatin atu nune’e bele lori tan sintu ne’ebé di’ak-liu mai Timor-Leste, buat hotu atu susesu nafatin fiar-aan treinu apoiu liuhusi ema seluk nune’e bele aumenta tan esperiensia foun.
“Husu ba Timoroan hotu atu apoiu nafatin ha’u ba futuru bele lori tan buat di’ak mai Timor-Leste, sintu ida-ne’e la’ós ikus maibé ida-ne’e hanesan eskada ida atu ita hatutan ba oin. Liu-liu ba joven sira foin sa’e sira ne’ebé hakarak sai boxista tenke esforsu-aan treinu nune’e bele ba kompete iha rai liur.” Dehan Elidio
Nia afirma iha oportunidade ne’e husu mós ba joven Timoroan hotu apoiu nafatin nia iha tempu saida de’it, tanba sintu ne’ebé nia hetan la’os ikus maibé hanesan eskada ida ba joven seluk atu hatutan tan husi mundu boxe, nune’e lori Timor-Leste ba mundu.
Iha fatin hanesan, treinadór klube Boxe Revolta Aplinario Maria Guterres, hato’o agradese no hakuak boot ba Timoroan hotu ne’ebé fó apoiu maka’as ba Elidio liuhusi orasaun no husu tulun mós husi rai lulik Timor-Leste no matebian, to’o ikus atleta bele sai duni kampiaun iha eventu internasionál X Promotion.
“Ha’u hanesan treinadór Elidio nian fó obrigadu ba rai doben Timor-Leste, liu-liu ba joven no família sira hotu tanba imi-nia apoiu orasaun, apoiu morál, mak ohin loron ami manán sintu ida ne’e. Ami nia alvu la’os sintu ida-ne’e de’it maibé sei esforsu atu lori tan sintu mai ita-nia nasaun Timor-Leste iha futuru.” Dehan treinador klube Boxe Revolta, Aplinario Maria Guterres
Nia hatutan durante ne’e, boxista Elidio “El-Tigre” hala’o nia preparasaun iha nasaun Fransa, ne’ebé hetan apoiu másimu husi patrosinadór sira hanesan, Metro Link no seluk tan, tanba liuhusi apoiu hirak ne’e ohin loron hetan susesu hodi lori sintu mai Timor-Leste.
“Antes ne’e ami sai husi Timor-Leste, ami mós hasoru malu ona ho Prezidente Repúblika José Ramos Horta no Vise Primeiru-Ministru Francisco Kalbuadi Lay, hotu nia apoiu morál mak ami ba halo preparasaun ho di’ak. Ami nia esponsor Metro Link maun No, obrigadu, ikus-liu ha’u hakruuk ba povu doben Timor-Leste ho imi-nia apoia mak ami hatudu prestasaun di’ak iha kompetisaun ida ne’e.” Dehan treinador
Nia informa vitória neʼebé Boxista “El-Tigre” hetan bainhira kompete ho boxista husi nasaun Rusia ho naran Alex no iha kompetisaun ne’e El-Tigre konsege hatudu prestasaun neʼebé di’ak hodi manán Alex ho pontu ne’ebé diferensa. Husi pontu ne’ebé diferensa lori El-Tigre iha direitu absoluta manán sintu ida-ne’ebé signifikante, boxista Timoroan seluk seidauk hetan sintu refere.
Esplika liután boxista “El-Tigre, iha kinta (15 Maiu 2025) ne’e, ho nia ekipa fila hikas mai Timor-Leste ho aviaun Aero Dili. Iha Aeroportu Internasionál Prezidente Nicolau Lobato, Comoro Dili, boxista ne’e simu kedas husi Timoroan atus ba atus neʼebé halibur-aan hodi hein boxista “El-Tigre.
Reportajen : Nelfiano
Foto : Nelfiano