Díli, 09 Abril 2026 (Media Democracia) – Atividade suru rai henek iha Mota Comoro kontinua sai hanesan fonte rendimentu ba ema barak iha kapital Díli, ho esperansa atu sustenta moris loron-loron.
Iha Sidade Díli, ema ida-idak luta ba moris tuir dalan rasik, Mane barak buka servisu iha fatin oioin, no balun depende ba ai-leba. Maibé, joven ida ho naran Agustihno da Costa Lemos, husi Munisípiu Baucau, Postu Administrativu Laga, Suku Libagua, dadaun hela iha Fomentu II, hili atu buka moris liu husi suru rai henek iha Mota Comoro.
“Ha’u halo servisu piñera rai henek durante tinan haat ona, osan ne’ebé ha’u hetan, uza atu suporta ha’u nia aan rasik, ajuda ba mos ha’u nia maun ne’ebé durante ne’e tau matan ba ha’u nia edukasaun, no mos ajuda mos ha’u nia inan-aman no alin sira iha foho”. Dehan Agostinho da Costa iha Mota Comoro.
Nia Reafirma tan katak bainhira remata estudu iha Ensino Secundário 12 de Novembro iha tinan 2019, iha familia fó hanoin atu buka servisu di’ak liu. Maibé desizaun ne’ebé iha mak tenki, servisu piñera rai henek iha mota laran mak dalan alternativu ida atu hetan osan lalais.
’’Maske servisu ne’ebé todan, maibe nafatin luta ba moris hodi hetan netik osan ruma hodi bele atende ba nesisidade loron nian. Servisu ne’ebé dadaun ha’u halo ha’u sente livre tanba la iha ema ida obriga ha’u, no ha’u bele deskansa tuir oras ne’ebé ha’u hakarak. Servisu iha mota laran ne’e la fasil, Dala barak sente kolen, terus ba hamrok, hamlaha no loron nia manas maibé naftin esforsu hodi luta ba moris ida ne’e. Kada loron rendimentu ne’ebé hetan nia tenke hein loron ida ka rua Rai henek ne’ebé ma kami faán mak númeru 1 fa’an ho folin $20 no númeru 2 ho $15, iha semana ida, rendimentu masimu bele to’o deit $40.’’ Dehan Nia
Nia esplika liutan katak laos de’it servisu iha mota laran maibe fahe tempu mos oinsa atu aproveita mos tuir formasaun iha lian Korea, no agora dadaun ne’e hein hela prosesu kontratu atu ba servisu iha nasaun Korea. Mensajen ba foinsa’e sira atu la kolen ho servisu ne’ebé iha, no tenke fiar ba an rasik, hodi bele sustenta netik ba moris loron-loron.
Reportajen :Baquita Soares / Julia Estajiada
Foto :Baquita Soares / Julia Estajiada