Dili, 10 Marsu 2025 (Média Democracia) – Carmila Verdial Belo ho idade (30) husi Munisípiu Bobonaro daudaun ne’e hela iha Munisípiu Dili Postu-Administrativu Vera Cruz Suku Motael, Aldeia Boa-morena, loron-loron sempre halo atividade negosiu ki’ik iha trotoar leten hodi responde ba nia presiza.
Tuir negosiante Carmila Verdial Belo hateten, durante tinan barak nia laran moris hanesan ema negosiante hodi halo atividade negosiu ki’ik hanesan fa’an sasan pintura ba labarik ki’ik nian, nune’e bele hetan osan ituan hodi sustenta ba nesesidade loron-loron nian
“Ha’u kria negósiu ki’ik hanesan fa’an sasan pitura ba labarik ki’ik sira desde tinan barak nia laran ona iha resintu Eskola SD Vila-verde, nune’e estudante oan sira presiza lalis karik bele hola. Maibé daudaun ne’e ha’u labele fa’an ona iha resintu eskola nian, tanba siguransa husi eskola refere la hatan ona atu fa’an sasan iha area eskola nian. Entaun ha’u deside lori sasan mai fa’an fali iha trotoar leten maibé besik eskola, bainhira lori ba fa’an dook husi eskola problema mak sasan la folin, tanba sasan ne’ebé ha’u fa’an foka liubá estudante oan sira.” Dehan Carmila Verdial Belo
Nia hatutan tan katak, sasan pintura ne’ebé fa’an ba estudante oan sira hanesan lapis kores, kores pintura nian, lapis, regua inklui lampra laser, durante ne’e nia deside fa’an sasan hanesan pintura ba estudante ona sira, tanba sasan bele folin lalais no kada loron hetan rendimentu ne’ebé naton
“Sasan pintura ne’ebé ha’u fa’an ho folin ne’ebé diferente husi $0,25 too $0,75, ne’eduni loron ida dalaruma ha’u hetan to’o $4.00 dolar, karik sorte aat dalaruma hetan de’it $1.00 dolar kada loron, tanba daudaun ne’e ha’u fa’an sasan sai husi areá eskola nian entaun estudante sira ladun hola ona, hanesan tempu uluk ne’ebé ha’u fa’an iha resintu eskola nian. Maske sasan la folin ona hanesan tempu uluk nian maibé ha’u kontinua fa’an nafatin, nune’e bele hetan osan ituan hodi responde ba presiza nian.” Dehan nia
Nia afirma sasan ne’ebé lori halo negósiu ki’ik ne’e hola tutan husi loja xina nian lori osan 10 dolar kada semana, maibé sasan seidauk folin hotu lori de’it $5.00 dolar hola tuir sasan ne’ebé besik hotu ona hanesan lapis no lapis kores tanba sasan hirak ne’e estudante oan sira sempre hola lalais
Esplika liután katak Carmila oan ikus husi maun alin na’in sia, inan no aman mate hotu ona daudaun ne’e hela hamutuk nia familia rasik, entaun iha osan rasik nia deside kria atividade hanesan negósiu ki’ik fa’an sasan pintura nian ba estudante oan sira, nune’e bele hetan netik osan ituan hodi sustenta ba nia presiza loron-loron nian nune’e buat hotu labele depende ba familia.
Reportajen : Nelfiano
Foto : Nelfiano