Dili, 21 Outubru 2025 (Média Democracia) – Camara Comercio Industria Timor-Leste (sigla portugues) konvoka segundu reuniaun ho Ministeriu Obras Publiku nomos CCI-TL Munisipiu sira hodi haree ba klasifikasaun no rejistu empresa konstrusaun Timor-Leste nian.
Iha intervensaun Prezidente Camara Comercio Industria Timor-Leste CCI-TL Jorge Serrano informa, ohin enkontru ba dala rua nian atu haree liubá klasifikasaun no rejistu empreza konstrusaun nian maibé antes ne’e CCI-TL no MOP iha ona enkontru lubuk ida ona, koalia liu kona-ba servisu formal nomos informal nian.
“Agradese ba iha prezensa Ministeriu Obras Publiku MOP ne’ebé servisu hamutuk ho CCI-TL hodi koalia ona kona-ba servisu setor pribadu sira nian, ita-boot hatene muito bem Timoroan barak liu maka servisu iha konstrusaun sivil liuliu ezekuta obra servisu Estadu sira, husi servisu sira ne’e ita hala’o ona iha mós preokupasaun barak ne’ebé ita hasoru, tanba ne’e ohin lori ita mai hasoru hodi diskute hamutuk haforsa ita nian empresariu sira atu servisu iha konstrusaun sivil hodi bele forte di’ak liu ba oin.” Dehan Prezidente Camara Comercio Industria Timor-Leste CCI-TL Jorge Serrano
Prezidente CC-TL hatutan, apresia ba MOP ne’ebé durante ne’e realiza ona servisu lubuk ida hodi kontribui ba dezemvolvimentu rai laran liuliu ba parte infraestrutura nian, maske iha dezafiu no preokupasaun barak maka MOP rasik hasoru, tan ne’e hakarak dehan CCI-TL nafatin konsistensia hanesan parseriu estratejiku Governu nian liuhusi resolusaun ida nomos servisu hamutuk durante ne’e.
“Ha’u hanoin ohin ita sei koalia mós kona-ba dekretu lei No 27/2010, 22 dezembru alterado ba dekreto lei no 17-2021 de 22 de setembro regime juridico sertifikasaun inskrisaun empresa ba konstrusaun sivil no konsultoria teknika nian ne’ebé haruka mai iha CCI-TL kleur ona, ha’u hanoin ekipa lubuk ida iha laran husi Munisipiu nomos iha Dili rasik fiar katak ita hatene ona serbisu balun ne’ebé ita hala’o ona atu diskute hamutuk no tuir lolos ohin enkontru ida ne’e marka prezensa husi PM maibé iha ajenda balun, entaun ohin ita maka hasoru malu ekipa tekniku sira hodi enkontru no ha’u fiar katak hanoin di’ak ne’ebé MOP iha no ita hotu iha, atu tau padraun importante ida ba konstursaun sivil iha Timor-leste liuliu iha MOP.” Hatutan Prezidente Camara Comercio Industria Timor-Leste CCI-TL
Nia informa, lakleur tan Timor-Leste sei adere ba ASEAN, tan ne’e husu atu esforsu hodi halo preparasaun ba servisu sira ho di’ak, hodi kapasita setor pribadu sira tuir kbiit ne’ebé CCI-TL iha atu fasilita formasaun sira hanesan kontabilidade ba empresariu Timoroan sira, nune’e ba futuru di’ak liután.
Iha sorin seluk hatutan husi Ministeriu Obras Publiku (MOP) Samuel Marçal dehan, enkontru ho CCI-TL atu hahú no implementa no atu re-organiza fali setor privadu nasional sira importante tebes atu reforsa ekonomia iha rai laran.
“Governu iha planu ne’ebé atu implementa maka setor privadu sira no presiza halo klasifikasaun ba setor privadu sira tuir sira nia kapasidade ho rekursu sira iha. Agora dadaun ne’e setor privadu barak ladun re-organiza, entaun ema balun foin aprende kaer projeitu sira ne’ebé bo’ot depois to’o ikus husik no abandona.” Dehan Ministeriu Obras Publiku (MOP) Samuel Marçal
Ministeriu Obras Publiku (MOP) informa, Ohin enkontru ho CCI-TL atu deskute kona-ba setor privadu sira no rona sira nia hanoin oinsá dalan di’ak ida atu setor privadu sira implementa tuir programa Governu nian. Kada tinan planu sira tuir mai hodi hare’e setor privadu nasional ladun iha oportunidade ho involvementu ba programa governu nia, oinsá atu involve setor privadu sira iha prosesu infraestrutura sira tuir mai.
“Ita hahú halo klasifikasaun tuir kapasidade no rekursu sira iha, hodi nune’e tinan ida ne’e hahu halo klasifikasaun ba setor privadu sira hodi hare’e to’ok saida mak atu halo iha tinan oin. Ohin, rona preokupasaun husi setor privadu sira no ami ho CCI-TL tenta atu akomula setor privadu sira husi Munisipiu hotu nia preukupasaun no ideia.” Infroma Ministeriu Obras Publiku
Nia reafirma, husi enkontru ida ohin iha ona setor privadu sira ne’ebé agora daudaun registu ona iha CCI-TL no sei klasifikasaun ba iha setor hirak ne’e CCI-TL no MOP mós sei hare’e kriteria ne’ebé setor ida priense no sei iha klasifikasaun A to’o C tanba MOP no CCI-TL lakoi fó oportunidade ba empresaria laiha kapasidade tama ba klasifikasaun A, nune’e buat hotu lao tuir nia dalan.
Reportajen : Domingas
Foto : Domingas