Dili, 01 Outubru 2025 (Média Democracia) – Core Group Transparency Timor-Leste (CGT-TL) konsidera Governu liuhusi Ministeriu Solidariedade Sosial no Inklusaun (MSSI) atendementu ba ema ho defisiensia sira iha fatin publiku seidauk iha transparansia no dignu.
Iha entrevista ho Jestor Programa Open the Book Core Group tranparancy Timor-Leste, Sabino Fitun hateten, Governu nia atendimentu ba ema ho defisiensia sira sei lenuk hela, no sira hatene katak ema ho defisiensia vulneravel tebes.
“Ita haree dala ruma liña ministeriais sira atendimentu ba ema ho defisiensia sira ladun sensibilidade inkluzivu, ita haree deit ezemplu kiikoan ida maka ponte ne’ebé sira halo iha Kuluhun seidauk sensibilidade ba defisiensia sira atu bele uza movimentu.” Dehan Jestor Programa Open the Book Core Group tranparancy Timor-Leste, Sabino Fitun
Nia informa, nune’e Core Group Transparency Timor-Leste realiza sosializasaun kona-ba planu Asaun Nasional ba ema ho defisiensia sira no Autoridade Lokal Suku sira iha Munisipiu Dili atu bele fó hanoin ba Governu Timor-Leste atu bele tau transparansia no tratamentu ba Ema ho kondisaun difisiente iha Timor Leste ho dignu.
“Atividade ida ohin ne’e, ita halo sosializasaun kona-ba Planu Asaun Nasional ba ema ho defisiensia nomos Autoridade Lokal sira husi Munisipiu Dili.” Informa Jestor Programa Open the Book Core Group tranparancy Timor-Leste, Sabino Fitun iha salaun HAK farol (30/09)
Nia salienta CGT-TL hakarak konvida Xefe Suku sira atu fahe informasaun ba sira, tanba iha Munisipiu Dili SEATOU sobu komunidade sira nia uma nomos ema ho defisiensia sira nia uma.
“Ita hakarak fahe esperensia hamutuk ho Autoridade Lokal sira tanba iha Suku ida iha Bebonok governu halo tratamentu ba ema ho defisiensia ida ladun dignu.” Salienta Jestor Programa Open the Book Core Group tranparancy Timor-Leste
Nia afirma, bainhira ko’alia kona-ba direitu ema ho defisiensia presiza governu tenke tau matan ba asuntu ema ho defisiensia kuandu governu halo eviksaun ba defisiensia nia uma ka halo tratamentu kona-ba dokumentu presiza ho dignu. Tanba iha situasaun ema ho defisiensia sira mak Vulneravel liu, defisil atu asesu ba buat ruma. Ohin fahe informasaun ba Autoridade Lokal sira oinsá atu salvaguarda ba komunidade nomos defisiensia sira.
“Planu Asaun Nasional ba ema ho defisiensia sira presiza hatene, governu desde 2008 hodi kria Planu Asaun Nasional ba ema ho defisiensia 2023 to’o 2030. Atu hare’e ema ho defisiensia sira nia nesesidade no kada tinan governu tau osan kalae, entaun dala ruma Autoridade Lokal sira la hatene no sira nunka informa ho situasaun sira ne’e.” Afirma Jestor Programa Open the Book Core Group tranparancy Timor-Leste, Sabino Fitun
CGT-TL realiza atividade sira hanesan ne’e kona-ba ema ho defisiensia nia preokupasaun ba insfraestratura iha kapital Dili. Nomos husu ba Xefe Suku sira oinsa atu komunika ho Governu halo desenvolvementu tuir nesesidade ema ho defisiensia.
Nia konklui CGT-TL inisia atividade ida ne’e atu sira bele tau propriedade importante ba asuntu refere ne’ebé liga ba ema ho defisiensia.
Esplika kle’an liutan katak, atividade sosializasaun Planu Asaun Nasional ba Ema ho kondisaun difisiente ne’e hala’o iha salaun yayasan Hak Farol, partisipa masimu husi Jestor Core Group Tranparancy iha Timor-Leste ho ninian membru inklui mós autoridade lokal iha Munisipiu Dili reprezenta Postu-Administrativu ha’at, hanesan Postu-Administrativu Cristro Rei, Postu-Administrativu Dom Aleixo, Postu-Administrativu Nain Feto no Postu-Administrativu Vera kruz.
Reportajen : Domingas
Foto : Domingas