Dili, 17 Dezembru 2025 (Média Democracia) – Comité Orientador 25 (CO25) realiza atividade durante loron lima kona-ba Expozisaun no Reflesaun ho tema “Joventude e Luta Esperança do Povo.” Atividade refere hala’o iha Yayasan HAK Farol Dili, loron tersa semana ne’e.
Vise-Prezidente Comité Orientador 25 (CO25), Jacinto Alves hateten, Comité Orientador 25 nia mandatu atu hakerek istoria luta rezistensia nasional, nune’e hakerek mós Luta Joventude Frente Klandestina iha prosesu luta ba libertasaun nasional.
“Iha mandatu ne’e lalaok volume balun hotu ona iha balun mak seidauk hotu iha hela prosesu nia laran. Ami CO25 sente nesesidade katak antes atu lansa livru istoria tenke halo expozisaun ida ba frente klandestina nian, entaun ami loke ho sesaun reflesaun nune’e lori ita-nia joven sira atu komprende kontestu luta iha frente klandestina, hetan terus barak iha funu nia laran, valores importante ba joventude sira bele foti no tane nasaun ida-ne’e ba futuru.” Dehan Vise-Prezidente Comité Orientador 25 (CO25), Jacinto Alves
Vise-Prezidente hatutan, objetivu husi atividade reflesaun ida-ne’e katak transmisaun vontade espiritu valores fahe ba joventude sira atu banati tuir hodi labele husik nasaun ida-ne’e monu ba korrupsaun, krimi transnasionais nomos ba mafia nia liman, husu ba joven sira labele husik nasaun ida-ne’e, nafatin tane aas no hadomi nasaun Timor-Leste.
“Livru durante ne’e seidauk publika, livru primeru volume nian 1B ami halo hotu iha 2024 depois atu lansa maibé la akontese tanba hein husi Governu muda mai 2025 atu lansa iha 28 Novembru 50 anos nian maibé la jadi tanba Primeru Ministru okupadu ho servisu seluk, entaun laiha tempu. Iha tinan ida-ne’e ami kompletu ona volume rua ami espera katak bele lansa hotu kedas volume lima.” Hatutan Prezidente Comité Orientador 25 (CO25)
Vise-Prezidente Comité afirma, durante halo peskiza ba livru istoria hirak ne’e lao hadulas Timor-Leste hodi halo peskiza, tanba livru ne’e haree liubá luta rejistensia nasional nian nomos hakarak independensia hodi ukun rasik-an, nune’e livru refere hakerek kona-ba luta kontextu tomak.
“Livru ida-ne’e hakerek uza Metorolojia sientifika nune’e sei koloka ba Universitariu sira, maibé ba oin ita sei buka versaun ida popular nune’e pre-primari, primaria no segundariu mós bele aprende hotu. Maibé ami presiza halo diskusaun ho Ministeriu Edukasaun nune’e bele kria versaun popular nune’e estudante hotu-hotu bele aprende hodi hetan koiñesimentu foun kona-ba luta rezistensia nasional iha Timor-Leste.” Afirma Vise-Prezidente Comité Orientador 25 (CO25), Jacinto Alves
Vise-Prezidente informa, livru istoriku durante halo peskiza ho durasaun kleur, tanba CO25 hahú funda iha 2017 hodi halo rekrutamentu ba peskizadores maibé tama tiha iparse VII Governu nian entaun CO25 laiha finansial hodi halo peskiza, nune’e iha 2019 komesa obtamiliza fila-fali servisu maibé nafatin akontese problema covid-19 labele halo peskiza.
“Problema hotu ne’ebé ami hasoru impase iha 2020 entaun iha ne’e komesa halo servisu operasional lolos husi 2023 to’o 2025 nia laran, ami konsege halo buat barak hanesan iha Volume 1A hetan 95%, 1B nian remata ona, volume 3A hetan 85% nomos volume 3B hetan 85% ,iha volume 4 hetan 85% ona, ida ne’e mak porsentu husi servisu durante ne’e ami hala’o.” Infroma Prezidente Comité
Vise-Prezidente salienta, Comité Orientador 25 iha defikuldade ituan volume 2 no 5. Iha volume 2 kolia kona-ba funu iha ai-laran tanba lideransa sira mate hotu ona buka de’it mak 4 medius hodi halibur dadus nune’e bele esplika sai durante luta iha ai-laran. Volume 5 kolia kona-ba funu 1999 nian, entaun asesu dokumentu barak husi revizaun literaria no testamuña primarius. Difikuldade hirak ne’e Comité Orientador 25 labele kria dinamika ida iha mandatu nia laran.
Esplika liután iha momentu atividade ida-ne’e husu ba estudante sira hotu tenke pro-ativu no kritiku nune’e bele banati tuir joven sira iha frente klandestina, nune’e joven ida agora tenke sai kritiku ba situasaun sira hotu. Joven labele rona no fiar de’it maibé tenke fiskaliza nune’e muda koñesimentu no kapasidade ne’ebé luan sai kritiku hodi dezenvolve nasaun ida-ne’e iha futuru.
Reportajen : Nelfiano
Foto : Nelfiano