Dili, 18 Juñu 2025 (Média Democracia) – Cruz Vermelha Timor-Leste (CVTL), selebra loron aniversariu ba dala-25 no atividade ne’ebé durante CVTL eziste iha Timor-Leste, voluntariamente ba parseiru dezenvolmentu sira ne’ebé fó apoiu. Atividade selebrasaun ne’e hala’o iha edifisiu CVTL Formoza, Tersa semana ne’e.
Sekretáriu Jerál Interinu CVTL, Agapito da Silva hateten, relasiona ho Cruz Vermelha Timor-Leste (CVTL) nia ezistensia iha Timor-Leste sei monu iha loron 22 Juñu 2025, ba dala-25, tanba ne’e iha atividade lubuk ida husi CVTL realiza bazeia ba kooperasaun ne’ebé servisu hamutuk ho parseiru sira iha Timor-Leste no internasionál.
“Ezistensia CVTL komesa funda to’o agora tinan 25 ona, iha atividade barak durante ne’e CVTL, realiza primeiru atividade ita realiza bazeia kooperasaun nomos servisu hamutuk ho parseiru hotu-hotu espesial ba ita-nia governu no parseiru nasionál no internasionál iha rai laran. Haree kona-ba parseiru movimentu hanesan ICRS, IFRS nomos sosiedade sira durante CVTL kria programa barak voluntarismu.” Dehan Sekretáriu Jerál Interinu CVTL, Agapito da Silva
Nia hatutan, aleinde ne’e programa ne’ebé CVTL, lori mak programa Saúde, Resposta emerjensia, Primeiru sokorus, Bee saneamentu, Redusaun risku dezastre, Juventude no Reunifikasaun familia, programa sira ne’e CVTL halo kooperasaun ho parseiru sira hotu no Governu Timor-Leste.
“Haree kona-ba programa sira ne’e hanesan programa saúde, programa resposta emerjensia iha programa primeiru sokorus, Bee saneamentu, redusaun risku dezastre, Juventude nomos reunifikasaun familia. Relasiona programa hirak ne’e durante ne’e ita servisu hamutuk no halo koopersaun liuhusi parseiru dezenvolmentu iha rai laran no govenu hodi apoiu no fasilita ba programa hotu.” Dehan Sekretáriu Jerál Interinu CVTL
Nia informa haree kona-ba susesu Cruz Vermelha Timor-Leste infrenta komesa funda kondisaun fatin no fasilidade ne’ebé limitadu tebes, maibé durante nia eziste iha Timor-Leste ba dala-25 iha atinjimentu iha rekursu rasik no servisu inklui transporte utiliza hodi halo programa servisu CVTL nian.
Esplika liután Cruz Vermelha Timor-Leste (CVTL hanesan organizasaun umanitariu auxiliariu ba Estadu Timor-Leste rekoñesimentu nu’udar sosiedade nasional ho misaun atu salva vida ho di’ak kualidade moris ema vulneravel hotu laiha lukrutivu no rekupensasaun ruma servisu ho voluntarismu nune’e bele salva ema hotu-hotu nia moris.
Reportajen : Nelfiano
Foto : Nelfiano