Dili, 25 Juñu 2025 (Média Democracia) – Cruz Vermelha Timor-Leste CVTL selebra nia aniversariu ba dala ruanulu resin lima ho ninian tema “Keeping Humanity”, serimonia ne’e hala’o iha edifisiu CVTL kolmera Dili.
Iha entrevista ho Presidente Cruz Vermelha Timor-Leste (CVTL), Madalena Fernandes M. Hanjan Costa Soares hateten, selebrasaun CVTL 25 ne’e juveliu ida ne’ebé sai osan mutin ba Cruz Vermelha Timor-Leste (CVTL) no depois hetan iha independensia iha tinan 2002 hodi nia eziste iha tempu ne’ebé defisil.
“Ohin ita hamutuk iha ne’e hodi selebra aniversariu CVTL ba dala ruanulu resin lima (25), ne’e hatudu katak selebra juveliu vinte cinco anos osan mutin silver ba iha CVTL depois ita hetan independensia 2002, signifika katak CVTL hala’o ona nia servisu iha Timor-Leste kleur los ona.” Dehan Madalena Hanjan iha CVTL Formoza Dili, Tersa (24/06)
Cruz Vermelha Timor-Leste CVTL durante ne’e eziste ho voluntariamente maibé nafatin iha komitmentu hodi ajuda komunidade bainhira komunidade sira presiza, Aleinde ne’e mós karik iha atividades balun ne’ebé presiza CVTL nia apoiu hanesan atividades Covid 19 inklui mós Papa Francisco nia visita iha Timor-Leste, iha mós atividades balun ne’ebé CVTL halo hanesan dada bee moos no oferese raan ba komunidade sira ne’ebé presija.
“Husi ida ne’e historia ida agora ho vinte cinco anos ne Cruz Vermelha mantein iha maturidade atu hala’o nafatin nia servisu hodi suporta dezenvolvimentu nasionál iha ita-nia pais ho kualker situasaun ne’ebé iha.” Hatutan Madalena Hanjan
Nia reafirma, Cruz Vermelha Timor-Leste la hasai ema husi mukit maibé atu hasai komunidade sira husi problema ne’ebé enfrenta hodi hatudu dalan moris di’ak nian ba sira.
Iha fatin hanesan Presidente Autoridade Protesaun Civil (APC), Jesuino dos Reis Matos Carvalho hateten, fó kongratula ba selebrasaun Cruz Vermelha Timor-Leste, espera katak funsionariu no fundador CVTL sira, tenke halo refleksaun ba atividade hirak ne’ebé sira halo ona durante sira ezizensia iha nasaun ida ne’e.
“Ha’u kongratula ba CVTL nia aniversariu ne’e, ha’u espera katak sira bele halo refleksaun ba atividade tomak ne’ebé sira halo, liu-liu ita hatene katak CVTL sira dala barak liu servisu ho doasaun, depois hanesan iha voluntariu barak entaun sira ninia atividade barak sira halo enkoraza ema hotu atu partisipa liu-liu ba ita-nia komunidade sira atu bele kuidadu-an no prevene-an ba buat sira ne’ebé mak hamosu dezastre sira.” Dehan Prezidente Autoridade protesaun Sivíl
Entretantu governu apresia tebes Cruz Vermelha Timor-Leste (CVTL) mosu hodi kompleta governu nia servisu, ita haree dala ruma akontesementu iha Munisipiu, bainhira dezastre APC seidauk to’o fatin ne’e CVTL iha ona ne’ebá, entaun ida ne’e hanesan apoiu ne’ebé fó husi CVTL hodi apoiu governu, fó atensaum ba komunidade sira ne’ebé afeitadu ba ai-han no dezastre naturais.
Reportajen : Domingas
Foto : Domingas